​Bu kəndlərə köçənlərə 10 min avro veriləcək

Yunanıstan Türkiyə ilə sərhəddə yerləşən üç kəndin əhalisini artırmaq üçün xüsusi bir kampaniyaya başlayıb. Hökumət bu demoqrafik problemi həll etmək məqsədilə əhaliyə rəsmi çağırış edib. Bu plan Soufli, Orestiada və Didymoteicho kəndlərini əhatə edir.

Bu bölgələrdə daimi məskunlaşmağı qəbul edən ailələrə maddi dəstək göstəriləcək. Maliyyə yardımı 10 min avro məbləğində ödəniləcək. Bu təşəbbüs yeni sakinləri cəlb etmək, bununla da sərhəd bölgələrinin əhalisini artırmaq məqsədi daşıyır.

Kəndlərin coğrafi yeri bu proqramın vacibliyini göstərir. Qeyd olunan yaşayış məntəqələrini Türkiyənin Ədirnə şəhərindən cəmi 25 kilometr məsafə ayırır. Sosial Birlik və Ailə İşləri naziri Domna Mixailidu ölkə vətəndaşlarını hökumətin bu mühüm təşəbbüsünə qoşulmağa dəvət edib. Maraqlıdır ki, həmin kəndlərin əhalisi arasında türklər çoxluq təşkil edir. Yunanıstan bu planla sərhədyanı ərazilərin demoqrafik balansını dəyişdirməyə çalışır.