Bu, müəllimin maaşının artmasına səbəb olacaq - Nazir

Elm və təhsil naziri Emin Əmrullayev İTV-nin “Diqqət mərkəzində” verilişində müəllimlərin rifahının yüksəldilməsi və maaşlarının artırılması ilə bağlı mühüm planları açıqlayıb. Əmrullayev bildirib ki, növbəti sertifikatlaşdırma mərhələsində 35 faiz əmsalından istifadə edilməyəcək. Bunun yerinə, nazirlik vahid əmsal tətbiq etməyi planlaşdırır. Bu əmsalın dəqiqləşdirilməsi müxtəlif dövlət qurumlarının birgə qərarı əsasında həyata keçiriləcək. Nazir qeyd edib ki, bu yeni sistemin tətbiqi müəllimin əməkhaqqısının artmasına səbəb olacaq. Bu dəyişiklik təhsil sistemindəki köklü islahatların tərkib hissəsidir.

Proses mərhələli şəkildə həyata keçiriləcək və bu çərçivədə 20 min tam ştat müəllim vəzifəsi yaradılacaq. Nazir mövcud iş şəraitindən danışarkən, bir çox müəllimin oturmağa belə yeri olmadığını vurğulayıb. Ən yaxşı vəziyyətdə olan, öz sinfi olan müəllimlərin isə dərs saatı çoxdur. Həftəlik 12-13 saat dərsi olan müəllimin ayrıca iş otağının olmaması böyük problemdir. Buna görə də, müəllimin rifahını yüksəltmək üçün atılan addımlar arasında ilk növbədə maaş artımı gəlir. Bundan sonra işə aidlik, motivasiya yüksəldilməli və ümumi iş şəraiti yaxşılaşdırılmalıdır.

Nazir açıqlayıb ki, tam ştata keçən müəllimin aylıq əməkhaqqısı orta əməkhaqqıdan iki dəfə çox olmalıdır. Əgər 20 min müəllim bu yüksək əməkhaqqını ala bilərsə, bu, təhsildə böyük islahatların başlanğıcı sayılacaq. Tam ştatlı müəllim həftəlik 30-36 saat işləyəcək, bunun 18-24 saatı birbaşa tədrisə ayrılacaq. Lakin qeyd edilib ki, bu sistem bütün müəllimlərə şamil edilməyəcək. Söhbət əsasən böyük məktəblərdən gedir, çünki kiçik məktəbləri bu yeni tam ştat sisteminə keçirmək mümkün olmayacaq. Qalan müəllimlər əvvəlki kimi saathesabı dərs deməyə davam edəcəklər.

Emin Əmrullayev bu prosesin həyata keçirilməsi üçün infrastruktur imkanlarının mövcud olduğunu, eyni zamanda yeni infrastrukturun da yaradılacağını bildirib. O qeyd edib ki, müəllim öz iş yeri ilə qürur duymalı və işə həvəslə gəlməlidir. Bu yeni model müəllimin təkcə dərs deməklə kifayətlənməməsini nəzərdə tutur. Müəllimlər dərsdən əlavə, başqa müəllimlərin dərslərini dinləyərək tövsiyələr verə bilər, həmçinin şagirdlər üçün metodoloji tövsiyələr hazırlaya bilərlər. Bu addımlar peşənin nüfuzunu qaldırmaq məqsədi daşıyır.