Bu müəllimlərin maaşı artacaq

Elm və təhsil naziri Emin Əmrullayev məktəblərdə daimi və rəqabətli müəllim modelinə keçid planlarının tətbiq olunacağını açıqlayıb. Nazir bu barədə Milli Məclisin komitələrinin birgə iclasında, 2026-cı ilin dövlət büdcəsi layihəsinin müzakirəsi zamanı danışıb.

Bu yeniliyin əsas məqsədi müəllimlər üçün daha rəqabətli, dayanıqlı və ədalətli əmək sistemi qurmaqdır. Nazir bildirib ki, yeni sistem tamamilə könüllü və rəqabətə əsaslanacaq, heç bir müəllim bu modelə qoşulmağa məcbur edilməyəcək. Yeni modelə qoşulan müəllimlər daimi işlə təmin ediləcək, onların əməyinin qarşılığı əhəmiyyətli dərəcədə yüksək olacaq. Bu müəllimlərin dərs yükü həftədə 18-24 saat təşkil edəcək. Qalan vaxtlarını isə onlar metodik hazırlığa, şagirdlərlə fərdi iş aparmağa və layihələrdə iştirak etməyə sərf edəcəklər.

Emin Əmrullayevin sözlərinə görə, modeldə yalnız yüksək peşə göstəricilərinə malik, sertifikasiyada yüksək bal toplamış müəllimlər iştirak edə bilərlər. Kim istəmirsə, əvvəlki kimi, sovet sistemindən miras qalmış "stavka" prinsipi ilə saat hesabı ilə işləməyə davam edə bilər. Lakin nazir başa düşməyin vacib olduğunu qeyd edib ki, bu köhnə sistem artıq davamlı ola bilməz. Hazırda təxminən hər dörd müəllimdən biri həftədə cəmi 13 saat dərs deyir. Yeni model müəllimin məktəbə daimi bağlılığını təmin edəcək və əməyin qiymətləndirilməsində əsaslı dönüş yaradacaq.