Bu şəxslərin pensiya təyinatı ilə bağlı yeni qayda tətbiq edildi

Əmək və Əhalinin Sosial Müdafiəsi Nazirliyinin yaydığı məlumata görə, Hərbi qulluqçuların pensiya təyinatı ilə bağlı qaydalarda əsaslı dəyişikliklər edilib. Nazirlər Kabineti bu sahədə böyük yenilik gətirən yeni qərar qəbul edib. Belə ki, hərbi qulluqçulara və pensiya təminatı zamanı onlara bərabər tutulan xüsusi rütbəli şəxslərə pensiya təyinatı ilə bağlı bütün qaydalar artıq vahid normativ aktda birləşdirilib.

Bundan əvvəl, hərbi xidmət müddətinin və təminat xərcliyinin hesablanması, habelə bu barədə məlumatların təqdim edilməsi kimi bir-biri ilə sıx əlaqəli olan və eyni tənzimləmə sahəsinə aid olan işlər ayrı-ayrı qaydalar əsasında həyata keçirilirdi. Bu vəziyyət prosesləri mürəkkəbləşdirir və idarəçiliyi çətinləşdirirdi. Müasir normayaratma tələblərinə uyğun olaraq aparılan təkmilləşdirmə işləri sayəsində bu çatışmazlıq aradan qaldırılıb.

Artıq bu istiqamətdə bütün proseslər bir hüquqi sənəd əsasında aparılacaq. Həmin sənəd yeni qərarla təsdiq edilmiş "Hərbi xidmət müddətinin və təminat xərcliyinin hesablanması və bu barədə məlumatların təqdim olunması Qaydaları" adlanır. Nazirlər Kabinetinin bu yeni qərarı müvafiq qanunvericilikdə texniki xarakterli bir sıra dəyişiklikləri də nəzərdə tutur. Bu addım pensiya təminatı mexanizmini sadələşdirir və daha aydın edir.