Bu yolda hərəkətin təşkilində dəyişiklik edilidi -FOTO

Bakıda daha bir yolda hərəkətin təşkilində dəyişiklik edilib. Bu dəfə Tbilisi prospekti və Əbdülvahab Salamzadə küçəsinin kəsişməsi seçilib. Mühüm yenilik avtobus zolağının davamına sarı torun çəkilməsi ilə bağlıdır.

Bu yeni nişanlanma sayəsində ictimai nəqliyyatın prospekt boyunca daha sürətli və təhlükəsiz hərəkətinə şərait yaradılıb. Sarı tor mexanizmi avtobusların tıxac nöqtələrindən daha sərbəst keçməsinə kömək edir, bu da ictimai nəqliyyatın effektivliyini artırır. Bu addımın əsas məqsədi paytaxtın ümumi nəqliyyat sisteminin idarəetməsini yaxşılaşdırmaqdır.

Sarı torun tətbiqi avtomobil sürücülərinə yeni məsuliyyətlər yükləyir. Əgər avtomobillər sıxlıq vaxtı torun üzərində qalarsa, bu inzibati məsuliyyət yaradır. Sürücü qarşıda nəqliyyatın dayandığını gördükdə və torun üzərində dayanacağını yəqin etdikdə oraya daxil olmamalıdır. Bu qayda hərəkətin axıcılığını qorumaq üçün çox vacibdir. Qeyd edək ki, Bakıda bu cür hərəkət təşkilində dəyişikliklər əvvəllər F. Xoyski və M. Hadi küçələrində də edilmişdi. Bu təcrübə şəhər ərazisində nəqliyyatın təhlükəsizliyini və sürətini artırmağa xidmət edir.