Cəmil Həsənli Azərbaycandan qaçmaq istəyib

Milli Şuranın sədri və sabiq deputat Cəmil Həsənli Azərbaycandan getmək cəhdi zamanı məhdudiyyətlə üzləşib. O, sosial şəbəkədə bildirmişdi ki, guya həyat yoldaşı ilə birlikdə "qızının ailəvi tədbiri" səbəbindən Dubaya yola düşürdü. Lakin Həsənli aeroportda ona ölkədən çıxış qadağası qoyulduğunu öyrənib. Məlumata görə, Cəmil Həsənlinin həyat yoldaşı ölkəni tərk edə bilib, amma keçmiş deputat geri qaytarılıb.

Onun tələsik ölkəni tərk etmək istəyi, ehtimal ki, istintaqdan yayınmaq məqsədi daşıyırdı. Bu hadisə siyasi fəalların dindirilməsi və axtarışların aparıldığı bir vaxta təsadüf edir. Dünən Milli Şuranın üzvü, AXCP sədri Əli Kərimlinin və AXCP Rəyasət Heyətinin üzvü Məmməd İbrahimin evlərində axtarışlar həyata keçirilib. Daha sonra hər iki şəxs Dövlət Təhlükəsizliyi Xidmətində (DTX) dindirilib.

Bütün bu proseslər Ramiz Mehdiyevin DTX-də istintaq altında olan cinayət işi ilə əlaqəlidir. Axtarışlar zamanı Əli Kərimlinin evindən "Milyarderlər İttifaqı" ilə əlaqələrə dair materiallar və Ramiz Mehdiyev tərəfindən yazılmış məktubun ilkin, mediada olmayan redaktə variantı tapılıb. Rüstəm İbrahimbəyovun Rusiyadakı "Milyarderlər ittifaqı"nın Azərbaycandakı icraçılarının kimliyi bu hadisələrin fonunda aktuallaşır.

Cəmil Həsənlinin qaçma cəhdi digər Milli Şura üzvlərinə qarşı görülən tədbirlərdən dərhal sonra baş verir. Dünən axşam saatlarında Milli Şuranın digər üzvü Gültəkin Hacıbəyli Türkiyədə saxlanılıb. O, Azərbaycana deportasiya edilmək üçün İstanbul Arnavutköy miqrasiya məntəqəsinə aparılıb. Qeyd edək ki, mediada bir müddət əvvəl Gültəkin Hacıbəylinin də ölkədən qaçdığı barədə xəbərlər yayılmışdı. Gültəkin Hacıbəyli bunu təkzib etsə də, onun "təkzib"i Türkiyədən etdiyi qısa müddətdə bəlli olmuşdu. Bu cür hadisələr siyasi fəallar arasında məsuliyyətdən kənarlaşmaq meylini göstərir.