Ceyhun Bayramov Vatikanın arxiyepiskopu ilə müzakirə apardı

Azərbaycan xarici işlər naziri Ceyhun Bayramov Vatikana rəsmi səfəri çərçivəsində Müqəddəs Taxt-Tacın dövlət və beynəlxalq təşkilatlar üzrə katibi arxiyepiskop Riçard Qallager ilə görüşüb. Bu görüş haqqında Azərbaycan Xarici İşlər Nazirliyi məlumat yayıb.

Görüşdə Azərbaycan Respublikası ilə Müqəddəs Taxt arasında ikitərəfli münasibətlərin hazırkı vəziyyəti və inkişaf perspektivləri əsas müzakirə mövzusu oldu. Tərəflər regional və beynəlxalq məsələlərə, habelə beynəlxalq platformalar çərçivəsində əməkdaşlıq imkanlarına toxundular. Əməkdaşlıq əlaqələrinin daha da dərinləşdirilməsi üçün son zamanlar yüksək səviyyəli səfərlərin artan dinamikasını qoruyub saxlamağın vacibliyi diqqətə çatdırıldı.

Bu çərçivədə, Azərbaycan Prezidentinin Vatikana rəsmi səfərləri, eləcə də Birinci vitse-prezident Mehriban Əliyevanın cari ilin oktyabr ayında Müqəddəs Taxt-Taca baş tutan səfəri və səfər zamanı həyata keçirilmiş tədbirlərin əhəmiyyəti vurğulandı. Mehriban Əliyevanın təşəbbüsü və Heydər Əliyev Fondunun dəstəyi ilə Müqəddəs Taxt-Tacda indiyə qədər həyata keçirilmiş və gələcəkdə planlaşdırılan humanitar xarakterli mühafizə və bərpa layihələri məmnunluqla xatırlandı. Xüsusilə, Mehriban xanım Əliyevanın Vatikana səfəri zamanı Avropanın ən böyük pediatrik xəstəxanası olan "Bambino Gesu"nu ziyarət etməsi və ölkəmizlə bu sahədə əməkdaşlıq əlaqələrinin önəmi qeyd olundu. Tərəflər 2027-ci ildə qeyd ediləcək diplomatik münasibətlərin təsis edilməsinin 35 illiyinin münasibətlərin inkişafına əlavə təkan verəcəyinə əminlik ifadə etdilər.

Görüşdə Azərbaycanın dini tolerantlıq, mədəniyyətlərarası və etiqadlararası dialoq sahəsindəki uğurları diqqətə çatdırıldı. Ölkəmizdə xristian məbədləri də daxil olmaqla, dini abidələrin bərpası və qorunması üzrə görülən işlər haqqında danışıldı. Azərbaycan müxtəlif din və mədəniyyətlərin bir arada yaşadığı ölkə kimi apardığı siyasətlə beynəlxalq sülhə və anlaşmaya mühüm töhfə verir. Həmçinin, Papa II İoann Pavelin 2002-ci ildə, Papa Fransisin 2016-cı ildə ölkəmizə səfərləri və Bakıda II İoann Pavelin şərəfinə tikiləcək katolik kilsəsinin inşa edilməsi məmnuniyyətlə xatırlandı.

Daha sonra qlobal iqlim dəyişmələrindən narahatlıq ifadə olunaraq, nazir Bayramov qarşı tərəfə ölkəmizin COP29 sədri olaraq gördüyü işlər və təşəbbüsləri barədə məlumat verdi. Azərbaycanın enerji təhlükəsizliyinə töhfəsi, nəqliyyat dəhlizlərinin inkişafında rolu və Orta Asiya ölkələri ilə əlaqələr barədə fikir mübadiləsi aparıldı. Nazir Azərbaycan-Ermənistan normallaşma prosesi, tarixi Vaşinqton Zirvəsi zamanı əldə edilmiş razılaşmalar və onların icrası istiqamətində həyata keçirilən əməli tədbirlər, eləcə də münaqişədən sonra regionumuzdakı inkişaflar barədə ətraflı məlumat verdi. Görüşdə qarşılıqlı maraq doğuran digər ikitərəfli və regional məsələlər ətrafında fikir mübadiləsi aparıldı.