“Dərman təminatında yeni qaydalar təsdiqlənib” -Aynurə Əhmədova

Nazirlər Kabineti əhalinin dərman təminatını yaxşılaşdırmaq və tibbi sığorta sisteminin maliyyə dayanıqlığını artırmaq üçün yeni qaydalar təsdiq edib. Bu barədə İcbari Tibbi Sığorta üzrə Dövlət Agentliyinin Marketinq və İctimaiyyətlə əlaqələr departamentinin rəhbəri Aynurə Əhmədova məlumat verib.

Bu yeni qaydalara dərmanların Xidmətlər Zərfinə daxil edilməsi və ya çıxarılması üçün müəyyən edilmiş meyarlar daxildir. Ən vacib yeniliklərdən biri isə "Pozitiv siyahı"nın formalaşdırılmasıdır. Bu siyahı icbari tibbi sığorta hesabına ödəniləcək dərmanların rəsmi siyahısıdır. Aynurə Əhmədova qeyd edib ki, siyahının ilkin mərhələsi hazırda hazırlanır. Siyahıya salınan dərmanlar haqqında bütün lazımi məlumatlar - təsiredici maddə, dozalar və kompensasiya faizləri - Agentliyin rəsmi saytında dərc olunacaq.

Agentlik rəsmisi bildirib ki, ilkin mərhələdə siyahıya ürək-damar xəstəliklərinin müalicəsində istifadə olunan, qan təzyiqini salan dərmanlar əlavə edilib. Sığorta Fondu bu dərmanların dəyərini tam şəkildə və ya müəyyən hissəsini qarşılamağı planlaşdırır. Dərmanların siyahıya daxil edilməsi üçün tələb olunan meyarlar da təsdiqlənib. Əsas şərtlər arasında dərmanın dövlət reyestrində qeydiyyatı, keyfiyyət, təhlükəsizlik və effektivlik tələblərinə cavab verməsi kimi amillər var. Həmçinin, onun qiymətinin dövlət tərəfindən tənzimlənməsi və ən əsası Sığorta Fondunun maliyyə imkanlarına uyğun olması zəruridir.

Aynurə Əhmədova əlavə edib ki, dərmanların təyin edilməsi üçün əsas mexanizm kimi elektron resept sistemi təyin edilib. Hazırda Agentliyin məlumat bazası ilə elektron reseptlərin inteqrasiyası üzrə texniki işlər aparılır. Sığorta hesabına qarşılanan dərmanlar yalnız Agentliklə müqavilə bağlayan özəl apteklərdən veriləcək. Vətəndaşlar bu aptekləri asanlıqla tanısınlar deyə, onlar xüsusi loqo ilə işarələnəcək. Bu sistem dərman təminatının düzgün və nəzarətli şəkildə həyata keçirilməsinə kömək edəcək.