Direktorların işə qəbulu üzrə sənəd qəbulu başladı

Bu gün saat 11:00-dan etibarən direktor vəzifəsi vakant olan ümumi təhsil müəssisələrinə rəhbər seçimi prosesinin elektron sənəd qəbulu mərhələsinə start verilib. Elm və Təhsil Nazirliyi bununla bağlı məlumat yayıb. Direktorların işə qəbulu mərkəzləşdirilmiş qaydada, proqram təminatı vasitəsilə və müsabiqə yolu ilə həyata keçirilir.

Namizədlər qeydiyyatdan keçmək üçün 11 noyabr 2025-ci il saat 17:00-dək vaxta malikdirlər. Qeydiyyatı tamamlamaq istəyənlər https://miq.edu.az/direktor internet ünvanına daxil olmalıdırlar. Müsabiqə iki əsas mərhələdən ibarətdir: seçim və müsahibə. Seçim mərhələsində namizədlərin sistemə təqdim etdiyi məlumatların və sənədlərin düzgünlüyü yoxlanır. Yalnız yoxlamadan uğurla keçən namizədlər müsabiqənin növbəti – müsahibə mərhələsinə buraxılacaqlar. Sistem üzərində görünən vakant yerlər 15.10.2025-ci il tarixinə olan məlumatlara əsaslanır.

Namizədlər müsahibəyə xüsusi ardıcıllıq əsasında dəvət ediləcəklər. Dəvət olunma tərzi təhsil müəssisələrindəki şagirdlərin sayından (məsələn, 501-dən çox və ya 500-ə qədər), eləcə də müəssisənin növündən, yəni lisey, gimnaziya, internat tipli lisey/gimnaziya olmasından asılıdır. Müsahibə mərhələsi Elm və Təhsil Nazirliyi tərəfindən təşkil edilmiş müvafiq komissiyalar tərəfindən aparılacaq. Namizədlər liderlik və strateji idarəetmə, pedaqoji, təşkilatçılıq, ünsiyyət, eləcə də problemlərin həlli və qərarvermə bacarıqları üzrə qiymətləndirilirlər. Onların rəqəmsal, texnoloji, sosial və emosional bacarıqları da nəzərə alınır. Hər bir namizəd müsabiqə nəticələri ilə “Şəxsi səhifə” vasitəsilə tanış ola biləcək. Müsabiqədən müvəffəqiyyətlə keçən şəxslərlə əmək münasibətləri qanunvericilikdə müəyyən edilmiş qaydada rəsmiləşdiriləcək.