DYP sürücülərə və piyadalara müraciət etdi

Baş Dövlət Yol Polisi İdarəsi (BDYPİ) sürücülərə və piyadalara müraciət edərək yollarda müşahidə olunan təhlükəli hallara diqqət çəkib. İdarə bildirir ki, ən böyük risklərdən biri piyadaların yol hərəkəti qaydalarına laqeyd yanaşmasıdır. Bəzən insanlar yaxınlıqda yeraltı və ya yerüstü piyada keçidi olmasına baxmayaraq, sədləri aşaraq, yaxud birbaşa yolun hərəkət hissəsinə çıxırlar. Bu cür davranışlar insanları birbaşa təhlükə ilə üz-üzə qoyur. Bir anlıq tələskənlik, diqqətsizlik, yaxud səhlənkarlıq çox vaxt faciəli nəticələrlə bitir, buna görə də qaydalara ciddi riayət etmək tələb olunur.

Aparılan araşdırmalar bu təhlükənin miqyasını göstərir: piyada vurulması ilə nəticələnən hadisələrin 90 faizdən çoxu məhz piyada keçidlərindən kənarda baş verir. Bu fakt bir daha sübut edir ki, yol hərəkəti qaydalarına əməl etmək sadəcə tövsiyə yox, həyatın qorunması üçün zəruri şərtdir. Unutmaq olmaz ki, əgər piyadanın qayda pozuntusu törətməsi nəticəsində yol-nəqliyyat hadisəsi baş verərsə və bu hadisə insanın xəsarət almasına, hətta ölümünə səbəb olarsa, bu, artıq cinayət məsuliyyəti yaradır. Piyadaların qaydalara riayət etməsi həm özlərinin, həm də ətrafdakıların təhlükəsizliyini təmin edir.

BDYPİ qarşıdan gələn payız-qış mövsümünü nəzərə alaraq piyadalara xüsusi müraciət edib. Havanın tez qaralması və görünmə şəraitinin pisləşməsi riskləri artırır. Polis yolu yalnız piyada keçidlərindən keçməyi tövsiyə edir. Görünmə məhdud olduğu şəraitdə və qaranlıq vaxtı piyadalar daha diqqətli olmalı, parlaq geyimlər geyinməlidirlər. Həmçinin, müraciətdə qeyd olunur ki, qulaqlıqdan istifadə etmək olmaz, çünki bu, yaxınlaşan avtomobillərin səsini eşitməyə mane olur. Qaydalara əməl etmək sizin və ətrafınızdakı insanların həyatının təminatıdır.