Ersin Tatar seçkidə məğlub oldu-YENİLƏNİB

Cümhuriyyətçi Türk Partiyasının sədri Tufan Erhürman Şimali Kipr Türk Respublikasında (ŞKTR) keçirilən prezident seçkilərində liderliyini qoruyur. Ölkənin Ali Seçki Şurasının açıqladığı son rəqəmlər hazırkı prezident Ersin Tatarın seçkidə məğlub olduğunu göstərir. Seçki qutularının böyük əksəriyyəti açılıb. Mövcud 777 qutudan 735-i hesaba alınıb.

Bu nəticələrə görə, T. Erhürman səslərin 62,80 faizini toplayıb. Müstəqil namizəd qismində yarışan hazırkı prezident Ersin Tatar isə seçicilərin yalnız 35,77 faizinin dəstəyini qazanıb. Bu fərq Tufan Erhürmanın böyük üstünlüklə qələbə qazandığını bildirir. Bu məlumatlar həm də Ersin Tatarın vəzifəsini itirdiyini təsdiqləyir.

Tufan Erhürman siyasi baxışlarına görə mərkəz-sol yönümlü, sosial-demokrat siyasi xəttin təmsilçisidir. O, Şimali Kipr siyasətində islahatçı və demokratik dəyərləri müdafiə edən fiqurlardan biri kimi tanınır. Erhürmanın Kipr məsələsinə yanaşması federal əsaslı həlli nəzərdə tutur. O, yunan və türk icmalarının bərabər hüquqlu tərəflər kimi federativ sistemdə bir araya gəlməsini müdafiə edən birləşmiş Kipr modelini dəstəkləyir. Onun fikrincə, belə bir model bölgədə sabitliyin yaranmasına yardım edə bilər və beynəlxalq səviyyədə Kiprin qəbul edilməsini təmin edər.

Seçkilərin ilkin nəticələri açıqlananda da T. Erhürmanın böyük fərqlə öndə olduğu görünürdü. Əvvəlki rəsmi olmayan məlumatlarda, səslərin 48,19 faizi hesablananda, Cümhuriyyətçi Türk Partiyasının sədri 63,38 faiz səs yığmışdı. Hazırkı Prezident Ersin Tatarın səsi isə həmin vaxt 35,27 faiz idi. Qutuların demək olar ki, hamısının açılması ilə rəqəmlərdə kiçik dəyişikliklər olsa da, Tufan Erhürmanın liderliyi dəyişməz qaldı. Nəticələr Şimali Kipr Türk Respublikasında siyasi dəyişikliyin baş verdiyini göstərir.