İlham Əliyev BƏƏ Federal Milli Şurasının sədrini qəbul etdi

Azərbaycan Respublikasının Prezidenti İlham Əliyev oktyabrın 29-da Birləşmiş Ərəb Əmirlikləri (BƏƏ) Federal Milli Şurasının sədri Saqr Qobaşın rəhbərlik etdiyi nümayəndə heyətini qəbul etdi. Görüşdə Qonaq, ilk növbədə, BƏƏ Prezidenti Şeyx Məhəmməd bin Zayed Al Nəhyanın salamlarını dövlətimizin başçısına və Azərbaycan xalqına çatdırdı. Saqr Qobaş qeyd etdi ki, Şeyx Məhəmməd bin Zayed Al Nəhyan bu ilin sentyabrında Azərbaycana, xüsusilə Şuşa şəhərinə səfərini və Prezident Əliyevlə görüşünü məmnuniyyətlə xatırlayır. Prezident Əliyev salamlara görə minnətdarlığını bildirdi və öz salamlarını BƏƏ Prezidentinə çatdırmağı xahiş etdi. O, həm Əbu-Dabidə, həm də Bakı və Şuşada Şeyx Məhəmməd bin Zayed Al Nəhyanla apardığı müzakirələri xoş xatirələrlə yad etdi.

BƏƏ Federal Milli Şurasının sədri Azərbaycan Respublikası Konstitusiyasının qəbul edilməsinin 30 illiyinə həsr olunmuş beynəlxalq parlament konfransının yüksək səviyyədə təşkilindən danışdı. O, bu tədbirin ölkəmizin konstitusional dəyərlərə və suverenliyə nə qədər sadiq olduğunun aydın sübutu olduğunu vurğuladı. Qobaş Azərbaycanın inkişaf tempinə toxunaraq, bunun Prezident İlham Əliyevin uzaqgörən siyasəti nəticəsində mümkün olduğunu dedi. Qonaq paytaxt Bakının gözəlliyinin və memarlığının onda dərin təəssürat yaratdığını söylədi. Dövlətimizin başçısı BƏƏ-nin sabiq prezidenti Şeyx Zayed bin Sultan Al Nəhyanın uzaqgörən siyasəti və ölkə rəhbərliyinin ardıcıl səyləri nəticəsində əldə etdiyi uğurlu və nümunəvi inkişafı diqqətə çatdırdı. Həmçinin, ulu öndər Heydər Əliyevin Şeyx Zayed bin Sultan Al Nəhyanla 1994-cü ildə İslam Əməkdaşlıq Təşkilatının Kasablanka Sammitində görüşü yada salındı. Məhz həmin görüş ölkələr arasında hazırkı münasibətlərin təməlini qoydu.

Saqr Qobaş regionda sülhün təmin edilməsi, Azərbaycan ilə Ermənistan arasında münasibətlərin normallaşması münasibətilə Prezident İlham Əliyevi təbrik etdi. Dövlətimizin başçısı bu təbriklərə görə təşəkkürünü bildirdi. O qeyd etdi ki, Ermənistanın Azərbaycana qarşı 30 il davam edən işğalından sonra hər iki tərəf indi sülh şəraitində yaşamağa uyğunlaşır. Prezident Əliyev ölkəmizin regionda davamlı sülhün qurulması, xüsusilə də TRIPP xətti üzrə nəqliyyat bağlantılarının yaradılması istiqamətində səylərini davam etdirəcəyini söylədi. Söhbət zamanı Azərbaycanla BƏƏ arasında münasibətlərin bütün sahələr üzrə uğurla inkişaf etdiyi və strateji tərəfdaşlıq səviyyəsi daşıdığı qeyd edildi. Bu çərçivədə "Masdar" şirkətinin Azərbaycana bərpaolunan enerji sektoruna sərmayələri, həmçinin SOCAR-ADNOC əməkdaşlığı və qarşılıqlı investisiyalar xüsusi vurğulandı. İki ölkə arasında siyasi dialoq və iqtisadi əməkdaşlıq yüksək səviyyədə davam edir.