“Manato” bağlanır? - Məhdudiyyət qoyuldu

"SF Azerbaijan" şirkətinə məxsus "Manato" kredit təşkilatına məhdudiyyət tətbiq edilib. Artıq bir müddətdir ki, "Manato" yeni kredit verilməsini tamamilə dayandırıb. Bu vəziyyət qurumun fəaliyyəti ilə bağlı ciddi suallar yaradır.

Hazırda vətəndaşlar sayta daxil olub kredit almaq istəyəndə, bu hərəkətin mümkün olmadığını görürlər. İlk baxışda vətəndaşlar bu vəziyyəti texniki xəta kimi qəbul edirlər, lakin əslində kredit verilməsi dayandırılıb. Kredit verilməsi dayandırıldıqdan sonra şirkət hazırda ancaq mövcud borclarla məşğuldur. Qurumun əsas işi bu müddətdə köhnə borcların toplanması prosesidir.

"Manato"nun fəaliyyət göstərdiyi "SF Azerbaijan" şirkəti Latviyanın "Sun Finance Group"u tərəfindən yaradılıb. Azərbaycanda bu şirkət "Manato" və "Pulum.az" əmtəə nişanları adı altında işləyir. Təşkilatın üzərinə qoyulan məhdudiyyətin yaxın zamanda aradan qaldırılıb-qaldırılmayacağı hələlik məlum deyil. Bu vəziyyət qurumun kredit verilməsi işinin gələcəyi barədə qeyri-müəyyənlik yaradır.