Mənəvi dəyərləri qoruyan yeni model tapmalıyıq - Ramin Məmmədov

Dini Qurumlarla İş üzrə Dövlət Komitəsinin sədri Ramin Məmmədov bildirib ki, mənəvi dəyərləri qoruyan və cəmiyyəti dini radikalizm, həmçinin ekstremizm ideyalarından müdafiə edən yeni bir model tapılmalıdır.

Komitə sədri bu fikirləri “Müasir din təhsili modelləri: mənəvi dəyərlər və qlobal çağırışlar kontekstində” adlı beynəlxalq simpoziumun açılış mərasimində səsləndirib. Ramin Məmmədov vurğulayıb ki, dini təhsilin institusional əsaslarının qurulması ictimai münasibətlər sisteminin vacib elementi olan dövlət-din münasibətləri fonunda çıxış edir. Bu vəziyyət ənənəvi dini biliklərin tədrisində müasir alətlərin tətbiq edilməsini zəruri edir. Bu alətlərə rəqəmsal texnologiyalar, süni intellekt və yeni təhsil metodları daxildir.

Sədrin sözlərinə görə, din təhsili sadəcə dini biliklərin zənginləşdirilməsinə xidmət etmir. O, cəmiyyət daxilində sabitlik və qarşılıqlı etimadı gücləndirən mühüm bir alətdir. Dini təhsil həm də harmoniya yaradır, eyni zamanda milli mədəni və tarixi kimliyi qoruyur. Buna görə də dini təhsilin modernləşdirilməsi müasir dövrün çağırışlarına cavab vermək üçün çox əhəmiyyətlidir.