"Öcalan parlamentdə çıxış edəcək" - Ərdoğanın müşaviri

Otuz min günahsız insanın qətlində ittiham olunan və ömürlük həbs cəzasına məhkum edilən PKK lideri Abdullah Öcalanın Türkiyə Böyük Millət Məclisində (TBMM) çıxış edəcəyi bildirilir. Bu xəbər Türkiyə siyasətində böyük rezonans doğurub.

Bu açıqlamanı Türkiyə Prezidenti Rəcəb Tayyip Ərdoğanın müşaviri Mehmet Uçum verib. Məlumatda qeyd edilir ki, Mehmet Uçum "uşaq qatili" adlandırılan Öcalanın gələn həftə TBMM-ə gətirilməsi ehtimalını istisna etməyib. Ərdoğanın müşaviri əlavə edib ki, PKK lideri TBMM-nin nəzdində fəaliyyət göstərən Milli Birlik, Qardaşlıq və Demokratiya Komissiyasının üzvləri qarşısında danışacaq.

Bu çıxışın məqsədi xüsusi bir sənədin hazırlanmasıdır. Həmin sənəd Öcalanın bəyanatından sonra ölkə rəhbərliyinə təqdim edilməlidir. Bu hadisənin tarixi əhəmiyyəti var; xatırladaq ki, Abdullah Öcalanın əvvəlki müraciətindən sonra PKK üzvləri əllərində olan silahları Türkiyənin hüquq-mühafizə orqanlarına təhvil vermişdilər. Buna görə də, onun parlamentdəki bu yeni çıxışının gələcək siyasi proseslərə necə təsir edəcəyi maraqla izlənilir.