Ödəniş qarşılığında qızlarla tanışlıq “təklif edilir” - FOTO

Azərbaycanda bəzi sosial şəbəkə hesabları qızlarla tanışlıq məqsədilə ödənişli xidmətlər təklif edir. Bu vəziyyət ictimaiyyətdə geniş müzakirələrə və narazılığa yol açıb. Əsasən "TikTok" platformasında aktiv olan bu hesablar, özlərini tanışlıq səhifəsi kimi təqdim edirlər.

Həmin hesablarda gənc qızların şəkilləri, yaşları, yaşadığı ərazi və bürcləri kimi şəxsi məlumatlar açıq şəkildə paylaşılır. Bu xidmətdən istifadə edərək hər hansı biri ilə tanışlıq qurmağın müəyyən bir qiyməti var, xidmət haqqı kimi 15 manat tələb olunur. Belə fərdi məlumatların kütləvi şəkildə nümayiş etdirilməsi, sosial media istifadəçiləri arasında ciddi narahatlıq yaradıb.

Bu vəziyyətlə bağlı ən əsas sual şəxsi məlumatların qorunması ilə əlaqədardır. Hazırda bu qızların şəkillərinin və digər fərdi məlumatlarının yayılmasına onların razılığı olub-olmadığı məlum deyil. Məlumatların icazəsiz paylaşılması ehtimalı etik və hüquqi baxımdan problemlər doğurur. Digər sosial şəbəkə istifadəçiləri bu cür kommersiya xarakterli tanışlıq təkliflərinə qarşı çıxaraq, hadisəni birmənalı qarşılamayıblar.