Prezident müəssisə fəaliyyəti ilə tanış olub

Azərbaycan Prezidenti İlham Əliyev oktyabrın 28-də Sabirabad Sənaye Məhəlləsinə səfər edib. Prezident burada fəaliyyət göstərən "Azera Toxumçuluq" Məhdud Məsuliyyətli Cəmiyyətinin (MMC) toxum istehsalı müəssisəsinin işi ilə yaxından tanış oldu. "Azera Toxumçuluq" MMC 2021-ci ildə Sabirabad Sənaye Məhəlləsinin rezidenti olaraq qeydiyyata alınıb. Müəssisə kənd təsərrüfatı sektoruna dəstək olmaq məqsədilə standart və hibrid toxum növlərinin istehsalı üzərində çalışır.

Bu müəssisənin qurulmasında Türkiyənin qabaqcıl texnologiyaları tətbiq edilib. Hazırda burada bir sıra toxumluq kənd təsərrüfatı məhsulları istehsal olunur. Müəssisə illik istehsal gücünə görə region üçün vacib bir mərkəz sayılır. Müəssisə hər il 500 ton yonca, 800 ton hibrid qarğıdalı və 350 ton hibrid günəbaxan toxumu istehsal edə bilər. Bundan əlavə, onların istehsal gücünə 2 min ton arpa və 2 min ton buğda toxumu da daxildir. Geniş çeşidli toxum istehsalı müəssisəni yerli kənd təsərrüfatı üçün əsas təchizatçılardan biri edir.

Müəssisədə xammal kimi Sabirabad Pilot Aqroparkında yetişdirilən, eyni zamanda regionun kiçik, orta və iri fermer təsərrüfatlarından əldə olunan toxumlar istifadə edilir. Layihənin ümumi dəyəri 2,5 milyon manatdır. Müəssisənin istifadəyə verilməsi regionda məşğulluq səviyyəsinə müsbət təsir göstərəcək. Planlara görə, daimi iş yerlərinin sayı 20 nəfərə çatdırılacaq. Bu işlərə cəlb ediləcək şəxslər isə Sabirabad və ətraf rayonların sakinləri arasından seçiləcək.