Prezidentin təltif etdiyi general kimdir? - FOTO

Prezident İlham Əliyev bu yaxınlarda bir qrup hərbçini fərqli orden, medal və hərbi rütbələrlə təltif etdi. Mükafatlandırılan yüksək rütbəli hərbçilərin arasında Vətən Müharibəsi Qəhrəmanı Kənan Seyidov da var idi. Dövlət başçısının sərəncamı ilə o, general-leytenant hərbi rütbəsinə layiq görüldü. General-leytenant Seyidov uzun illər xidməti boyunca dəfələrlə mükafatlandırılıb və həm Qarabağ müharibəsi zamanı, həm də əvvəllər göstərdiyi xüsusi xidmətlərlə tanınır.

Kənan Seyidov 1974-cü ildə anadan olub. Onun adı xüsusilə Şuşanın işğaldan azad edilməsində göstərdiyi xüsusi qəhrəmanlıqla bağlıdır. O, hərbi xidmət illərində fərqli dövlət mükafatları alıb. 2003-cü ildə "Azərbaycan Bayrağı" ordeni, 2014-cü ildə "Vətən uğrunda" medalı, 2016-cı ildə isə "İgidliyə görə" medalı ilə təltif edilib. Azərbaycanın ərazi bütövlüyünün bərpa edilməsində xüsusi xidmətləri və işğal olunmuş ərazilərin azad olunması zamanı düşmənin məhv edilməsi üzrə döyüş tapşırığını yerinə yetirərkən göstərdiyi igidliyə görə Prezident İlham Əliyevin 9 dekabr 2020-ci il tarixli Sərəncamına əsasən Kənan Seyidova "Vətən Müharibəsi Qəhrəmanı" adı verildi. O, həmçinin Prezident tərəfindən "Hərbi xidmətlərə görə” medalı ilə də təltif edilib.

General-leytenant Kənan Seyidov hazırda Naxçıvanda yerləşən Əlahiddə Ümumqoşun Ordusunun komandanı vəzifəsini tutur. O, yüksək peşəkarlığı və hərbçilərə xas olan dəmir intizamı ilə seçilən bir şəxsdir. Tabeliyində xidmət edən əsgər və zabitlər general-leytenant Seyidovu ali mənəvi keyfiyyətlərə malik olan qayğıkeş bir komandir kimi xarakterizə edirlər. Onun karyerası Azərbaycanın müstəqilliyi və təhlükəsizliyi naminə göstərilən fədakarlığın bariz nümunəsidir.