Putin sülh planından danışdı

Rusiya Prezidenti Vladimir Putin Kollektiv Təhlükəsizlik Müqaviləsi Təşkilatının (KTMT) Zirvə Toplantısının yekunlarına dair keçirilən mətbuat konfransında Ukrayna ilə bağlı mühüm açıqlamalar verib. O bildirdi ki, Ukrayna hökuməti ilə hər hansı müqavilələr imzalamağın mənası yoxdur. Putin bu mövqeyini Ukrayna hökumətinin prezident seçkilərini keçirmədiyi üçün öz legitimliyini itirməsi ilə əlaqələndirir. Bu vəziyyət, onun fikrincə, Kiyevlə birbaşa danışıqların gələcəyini şübhə altına qoyur. Daha sonra Rusiya lideri ABŞ administrasiyası tərəfindən Ukrayna böhranının həlli üçün hazırlandığı iddia edilən sülh planına toxunub.

Putin həmin sülh təklifini şərh edərkən, bunun əslində tam formalaşmış bir plan olmadığını dedi. O qeyd etdi ki, danışıqlar üçün təklif olunan sadəcə bir sıra suallar var idi. Biz Alyaska sammitindən əvvəl bu məsələlərlə bağlı ABŞ tərəfi ilə məsləhətləşmələr apardıq. Bu ilkin danışıqlar bitəndən sonra 28 mümkün razılaşmanın siyahısı hazırlandı. Putin həmin sənədin müəyyən kanallar vasitəsilə Rusiya tərəfinə çatdırıldığını və onların bunu nəzərdən keçirdiyini bildirib.

Daha sonra ABŞ və Ukrayna arasında İsveçrənin Cenevrə şəhərində bu təkliflə bağlı danışıqlar aparılıb. Putin qeyd edib ki, bu görüşlər zamanı nümayəndələr aralarında qərar verərək, 28 maddəni dörd əsas komponentə bölüblər. Bütün bu məlumatlar Rusiya tərəfinə çatdırılıb. Rusiya lideri ümumilikdə, görülən bu işin potensial razılaşmalar üçün əsas ola biləcəyinə inandıqlarını vurğulayıb. O əlavə edib ki, Amerika tərəfi Ankoric sammitindən əvvəl və sonra Rusiya mövqeyinin bəzi aspektlərini nəzərə alır, bu da müsbət bir addımdır.