Qurban Qurbanov iki futbolçunu heyətdən qovub?

“Qarabağ” klubunun Çempionlar Liqasının əsas mərhələsində “Napoli” ilə keçirdiyi görüş gərgin anlarla yadda qaldı. Həmin oyunda (0:2) meydanda qeyri-adi bir hadisə baş verdi. İtalyanlar penalti zərbəsi vurmağa hazırlaşarkən Ağdam klubunun iki legioneri – Marko Yankoviç və Pedro Bikalyo arasında mübahisə yarandı. Onların mübahisəsi o qədər şiddətli oldu ki, komanda yoldaşları onları sakitləşdirməyə məcbur qaldılar. Hər kəs əcnəbi futbolçuların niyə dalaşdığını soruşurdu, amma səbəb ilkin olaraq bəlli deyildi.

Bu insident dərhal geniş müzakirələrə səbəb oldu. İdman ictimaiyyətində yayılan söz-söhbətlərə görə, baş məşqçi Qurban Qurbanov cütlüyü ağır şəkildə cərimələyib. Hətta Monteneqrolu Yankoviçlə braziliyalı Bikalyonun qeyri-müəyyən müddətə əsas heyətdən uzaqlaşdırılması iddia edilirdi. Məşqçi bu mübahisənin qəbuledilməz olduğunu düşünürdü. Lakin bu iddialar doğru çıxmadı. Son məlumatlar göstərir ki, Qurban Qurbanov yarımmüdafiəçilər barəsində heç bir pul cəriməsi tətbiq etməyib.

Mübahisə iştirakçıları, sadəcə, rəhbərlik tərəfindən tənbeh ediliblər. Onlar komanda daxilində tənqid olundular, amma heyətdən kənarlaşdırılmadılar. Futbolçular özlərini müdafiə edərkən bunun oyunun yüksək stressindən yaranan əsəbilik olduğunu bildirdilər. Onlar gərgin anlarda öz hisslərinə hakim ola bilmədiklərini və sadəcə, söz güləşdirdiklərini söyləyiblər. Beləliklə, gərginliyə baxmayaraq, Bikalyo və Yankoviç əsas heyətdə qalmağa davam edirlər.