Radardan sonra sürəti artıranlar cərimələnəcək

Bakı-Quba-Rusiya ilə dövlət sərhədi yeni avtomobil yolunda yüksək texnologiyalı sürət nəzarəti sistemləri tətbiq olunur. Yolda yeni radarlar və müşahidə kameraları quraşdırılıb, lakin hazırda onlar test rejimində işləyir. Bu proses Daxili İşlər Nazirliyinin (DİN) müvafiq qurumu tərəfindən həyata keçirilir. Ödənişli yolda yerləşdirilən bu qurğular köhnə modellərdən fərqli, ən müasir "ağıllı nəzarət sistemi" ilə çalışır. Yeni texnoloji qurğular real vaxtda bir-biri ilə məlumat mübadiləsi aparır. Bu o deməkdir ki, eyni yol xəttində ardıcıl qoyulan radarlar arasındakı məsafə nəzarətdə saxlanılır. Əgər sürücü bu iki nöqtə arasında sürət həddini aşarsa, sistem dərhal qeydiyyata alır.

Bu ağıllı radarlar avtomobilin həmin marşrut boyu orta sürəti hesablayır. Sürücülər yalnız radarın qarşısından keçərkən yox, bütün hərəkət trayektoriyası boyunca müəyyən olunmuş maksimal sürət həddinə əməl etməlidirlər. Sistemin tətbiq edilməsində əsas məqsəd yol təhlükəsizliyini artırmaqdır. O, həmçinin sürət həddinin süni şəkildə azaldılıb-artırılması yolu ilə cərimələrdən yayınma hallarının qarşısını almağa kömək edir. Hazırda texniki vasitələr sınaqdan keçirilir. Sınaq müddəti bitəndən sonra radarlar tam funksional şəkildə işə düşəcək və qayda pozuntuları avtomatik qeydə alınacaq.

Rəsmi qurumlar sürücülərə xəbərdarlıq edərək bildirir ki, yeni sistem təhlükəsizliyin təmin olunması üçün nəzərdə tutulub. Hərəkət edərkən yol nişanlarına ciddi riayət edilməlidir. Məlumata görə, Bakı-Quba-Rusiya ilə dövlət sərhədi avtomobil yolunun 129 kilometrlik ödənişli hissəsində geniş quraşdırma işləri aparılır. Təxminən 20 məntəqədə radarlar və xüsusi texniki vasitələr quraşdırılması nəzərdə tutulub.

Hazırda yolda qanunvericiliyə uyğun olaraq ən yüksək sürət həddi 110 km/saatdır. Bu məhdudiyyət yolun başlanğıc nöqtəsi olan Yeni Yaşma ödəmə məntəqəsindən son nöqtə - Yeni Sudur ödəmə məntəqəsinədək olan hissəsində bütün yol boyu qüvvədədir. Ödənişli yolda sürət həddinin artırılması ilə bağlı təkliflər də müzakirə olunur. Qeyd edək ki, maksimal sürət həddini, radar və müşahidə kameralarını göstərən yol nişanları bu ilin yanvar ayında quraşdırılmışdı.