Sərnişinlərin nəzərinə - Prosedur dəyişdi

Bakı Beynəlxalq Avtovağzal Kompleksində (BBAK) sərnişin axını çoxaldığı üçün bilet alışı qaydalarında dəyişiklik edilib. Bu dəyişiklik sərnişin daşımaları üzrə müvafiq qanunvericiliyə əsaslanır. Qayda dəyişikliyinin əsas səbəbi reyslərin vaxtında yola düşməsini, avtobusların düzgün komplektləşdirilməsini və digər təşkilati məsələləri maneəsiz həyata keçirməkdir.

BBAK-dan verilən məlumata görə, şəhərlərarası və rayonlararası marşrutlar üzrə bilet satışları avtobusun hərəkətinə ən geci 15 dəqiqə qalmış dayandırılır. Əgər avtobusun yola düşməsinə 15 dəqiqədən az vaxt qalıbsa, biletlər avtomatik olaraq növbəti planlaşdırılan reys üçün satılır. Bu yeni qayda həm avtovağzalın kassalarından, həm də internet üzərindən "biletim.az" portalı vasitəsilə alınan biletlərə tətbiq edilir.

Hazırda bu prosedur ilkin mərhələdə yalnız Bakı Beynəlxalq Avtovağzal Kompleksinə şamil olunur. Digər şəhər və rayon avtovağzalları bu qaydaya daxil edilməyib. Sərnişinlərdən xahiş olunur ki, bilet alarkən və avtovağzala gələrkən vaxtlarını yeni tətbiq edilən qaydalara əsasən tənzimləsinlər. Həmçinin, kassaya gəlmədən, rahat şəkildə bilet almaq üçün "biletim.az" platformasından istifadə etmək tövsiyə edilir.