Tanınmış dilçi alim vəfat etdi -FOTO

Naxçıvanın tanınmış dilçi alimi, dosent Əbülfəz Muxtaroğlu dünyasını dəyişib. Bu kədərli xəbəri Naxçıvan Dövlət Universiteti yayıb. Əbülfəz Muxtar oğlu Quliyev 1939-cu il iyunun 1-də Naxçıvan Muxtar Respublikasının Şahbuz rayonunun Zərnətün kəndində anadan olmuşdu. O, uzun illər ərzində Azərbaycan dilçiliyi sahəsində mühüm elmi və pedaqoji işlər görmüş, eləcə də gənc kadrların yetişməsinə böyük töhfələr vermişdir. Əbülfəz Muxtaroğlu Naxçıvanın elm və təhsil həyatında hörmətlə xatırlanan şəxslərdən biri idi.

Alim öz orta təhsilini Biçənək kənd yeddiillik məktəbində və Çayşahbuz onbirillik məktəbində alıb. 1963-cü ildə o, V.İ.Lenin adına Azərbaycan Pedaqoji İnstitutunun (indiki Azərbaycan Dövlət Pedaqoji Universiteti) Azərbaycan dili və ədəbiyyat ixtisasına qəbul olunub, 1967-ci ildə isə təhsilini başa vurub. Məzun olduqdan sonra, 1971-ci ilədək Şahbuz rayon Aşağı Qışlaq kənd orta məktəbində ixtisası üzrə müəllim kimi fəaliyyət göstərib. Bir il sonra, 1972-ci ildə müsabiqə yolu ilə V.İ.Lenin adına APİ-nin Naxçıvan filialına müəllim vəzifəsinə keçməyi bacarıb.

Əbülfəz Muxtaroğlu elmi axtarışlarını davam etdirərək Azərbaycan SSR EA-nın Nəsimi adına Dilçilik İnstitutunun Dialektolojiya şöbəsində dissertant kimi çalışıb. O, "Azərbaycan dilinin Şahbuz şivələrinin leksikası" mövzusunda namizədlik işini müdafiə edərək, filologiya üzrə fəlsəfə doktoru elmi dərəcəsinə yüksəlib. Həyatının sonrakı illərində Naxçıvan Dövlət Universitetinin "Azərbaycan dilçiliyi" və Naxçıvan Müəllimlər İnstitutunun "Dillər və ədəbiyyat" kafedralarında dosent kimi fəaliyyət göstərmişdi. O, eyni zamanda Azərbaycan Yazıçılar Birliyinin üzvü idi.