Təhsildə dəyişiklik dedikdə bunu nəzərdə tuturuq - Nazir

Elm və Təhsil Naziri Emin Əmrullayev cəmiyyətdə qadınların və qızların mövqeyinin möhkəmləndirilməsi, həmçinin onların müstəqil və layiqli qərar qəbul etmələri üçün təhsilin xüsusi əhəmiyyət daşıdığını bildirib. Nazir bu fikirləri “Gənc qızların təhsilinə dəstək” layihəsi çərçivəsində keçirilən “Hənifə Məlikova-Zərdabi adına təqaüd proqramı 2025” adlı tədbirdə səsləndirib. Əmrullayev qadınların təhsildəki rolunun bütün təhsil sisteminin funksionallığına birbaşa təsir etdiyini qeyd edib. O, xüsusilə təhsilli anaların uşaqların oxu və riyazi bacarıqlarının inkişafında böyük rolu olduğunu vurğulayıb.

Nazir hazırda bu prosesin hələ başlanğıcında olduğumuzu söyləyib. O bildirib ki, qızların təhsili istənilən cəmiyyətin inkişafına mühüm təsir göstərir və qarşıda görülməli çox uzun bir yol var. Hələ də məktəblərdə və ali təhsil müəssisələrində aparılmalı işlər mövcuddur. Əmrullayev qız uşaqlarına qarşı olan məhdudlaşdırıcı davranışdan dəstəkləyici davranışa keçid etməyin zəruri olduğunu qeyd edib. Təhsil almaq hər bir insanın inkişafına müsbət dəyər qatır. Bu səbəbdən qız uşaqlarına qarşı məhdudlaşdırıcı davranışdan uzaqlaşmalıyıq.

Ümumilikdə, hazırda ölkə gənclərinin 80-90 faizinə ali, orta ixtisas və ya peşə təhsili vermək imkanı mövcuddur. Nazir bu təhsil imkanlarından yararlanan qızların sayının getdikcə artdığını diqqətə çatdırıb. Bu artım gələcək nəsillərin daha çox ali təhsil almış gənclərdən ibarət olacağı mənasına gəlir. Əmrullayev proqnozlaşdırır ki, təxminən 10 il sonra bu səylərin həqiqətən böyük nəticələrini görmüş olacağıq. Nazir vurğulayıb ki, təhsildə uzunmüddətli dəyişiklik dedikdə, məhz bu irəliləyiş nəzərdə tutulur.