TKTA bu şəxslərə müraciət etdi

Təhsildə Keyfiyyət Təminatı Agentliyi (TKTA) xarici dövlətlərdən tibb ixtisasları üzrə akademik şəhadətnamə almış şəxslərə xüsusi müraciət edib. Bu müraciətin əsas səbəbi həmin şəhadətnamələrin ölkə ərazisində peşə fəaliyyəti ilə məşğul olmaq hüququ verməməsidir. Xarici ali təhsil kvalifikasiyalarının tanınması Azərbaycan Respublikası Prezidentinin 2023-cü il 18 avqust tarixli, 2306 nömrəli Fərmanı ilə təsdiq edilmiş “Xarici dövlətlərin ali təhsilə aid kvalifikasiyalarının tanınması Qaydaları” əsasında həyata keçirilir.

Qaydalara görə, xarici kvalifikasiya alan şəxslərin Azərbaycanda təhsilin növbəti səviyyəsinə qəbulu və ya peşə fəaliyyətinə başlaması üçün müvafiq sənədin TKTA tərəfindən tanınması qanunla məcburi şərt kimi təsbit edilib. Bununla yanaşı, tibb sahəsi tənzimlənən ixtisaslar kateqoriyasına daxildir. Buna görə də, əsas (baza ali) tibb təhsili səviyyəsindəki ixtisaslar üzrə xarici kvalifikasiyaların peşə tanınması yalnız Səhiyyə Nazirliyi tərəfindən təşkil olunan müvafiq imtahanlardan uğurla keçmək şərti ilə verilir.

Agentlik tərəfindən aparılan təhlillər göstərir ki, Qaydalar qəbul edildikdən sonra baza ali tibb təhsili ixtisasları üzrə tanınma üçün müraciət edən ərizəçilərin bir hissəsi Səhiyyə Nazirliyinin peşə ixtisası üzrə imtahanlarında müvəffəqiyyət qazana bilməyib. Bu şəxslər nəticədə yalnız akademik şəhadətnamə əldə ediblər. TKTA vurğulayır ki, akademik şəhadətnamə alan şəxslərin peşə fəaliyyəti ilə məşğul olmaları qanunvericiliyin tələblərinə ziddir. Bu sənəd, sadəcə, Azərbaycan ərazisində təhsilin növbəti səviyyəsinə qəbul olunmaq hüququ verir.

Buna görə də, ali təhsilin əsas tibb təhsili səviyyəsindəki ixtisaslar (tibb və stomatologiya) üzrə akademik şəhadətnamə almış şəxslər qanuni əsaslarla peşə fəaliyyətinə başlamaq üçün yenidən TKTA-ya müraciət etməlidirlər. Onlar Səhiyyə Nazirliyinin təşkil etdiyi müvafiq imtahandan müvəffəqiyyətlə keçməklə kvalifikasiyalarının tam tanınmasını təmin etməlidirlər. Yalnız bundan sonra onların tam peşə tanınması mümkün olacaq.