Toy karvanı avtomobillərin hərəkətini iflic etdi -VİDEO

Paytaxtın Xətai rayonunda baş verən hadisə ictimaiyyətdə ciddi narahatlıq yaradıb. Belə ki, bir toy karvanı mərkəzi yolda avtomobillərin hərəkətini tamamilə dayandırıb. Sosial şəbəkələrdə yayılan görüntülər bu hadisənin Nəsirəddin Tusi küçəsində baş verdiyini göstərir. Burada bir neçə avtomobil dayanaraq yüksək səslə musiqi səsləndirib, gənclər isə yolun ortasında rəqs etməyə başlayıblar.

Bu hərəkət nəticəsində yol tamamilə bağlanıb. Ən təhlükəlisi isə odur ki, toy korteji yolu məhz xəstəxananın qarşısında bağlayıb. Nəticədə, nə təcili tibb yardım maşınları, nə də digər avtomobillər irəliləyə bilməyib. Hadisə şahidləri vəziyyəti ciddi təhlükə kimi qiymətləndirirlər. Yol bağlandığı üçün arxada qalan sürücülər gecikməmək üçün alternativ yollara yönəlməyə məcbur qalıblar.

Yol hərəkəti qaydaları üzrə mütəxəssis Arzu Babazədə bildirir ki, bu cür hallar təkcə paytaxtda deyil, bölgələrdə də tez-tez müşahidə edilir. Ekspertlər bənzər hadisələrin son zamanlar artdığını qeyd edirlər. Bakı Şəhər Dövlət Yol Polisi İdarəsi (DYP) yayılan görüntülərdən xəbərdar olduqlarını bildirib. Hazırda məsələ ilə bağlı araşdırma aparılır. Yol polisi toy karvanında iştirak edən sürücülərə daha diqqətli olmalarını və mümkün qədər az sayda avtomobillə iştirak etməyi tövsiyə edir.