Üçtərəfli komissiya yaradılacaq

Milli Məclisin Regional məsələlər komitəsinin bu gün keçirilən iclasında Əmək Məcəlləsinə təklif edilən mühüm bir dəyişiklik müzakirə edilib. Təklifə əsasən, ölkədə əmək və sosial məsələlər üzrə daimi fəaliyyət göstərəcək üçtərəfli komissiya yaradılacaq.

Bu komissiyanın yaradılmasında əsas məqsəd Azərbaycan Respublikasında sosial-əmək münasibətlərinin tənzimlənməsinə dəstək vermək və sosial sabitliyi qorumaqdır. Komissiya kollektiv danışıqların aparılması, həmçinin Baş kollektiv sazişin layihəsinin hazırlanması üzrə işləri əlaqələndirəcək.

Komissiya tərəflərin hüquq bərabərliyi prinsipi əsasında formalaşır. O, müvafiq icra hakimiyyəti orqanının müəyyən etdiyi qurumun, həmkarlar ittifaqlarının və işəgötürənlərin ümumrespublika birliklərinin birgə qərarı ilə təsis edilir. Struktur hər bir tərəfdən bərabər sayda səlahiyyətli nümayəndədən ibarət olacaq. Komissiya sosial təminat sahəsində normativ hüquqi aktların layihələrinin hazırlanması ilə bağlı məsləhətləşmələr aparacaq və tərəflərin mövqelərini razılaşdıracaq.