​“WhatsApp” mesajlara limit tətbiq etdi - Çox göndərmək olmaz

“WhatsApp” mesajlaşma sistemi ilə bağlı yeni bir funksiya üzərində işləyir. Bu yenilik istifadəçilərin narahat edilməsinin qarşısını almağı hədəfləyir. Əsas məqsəd WhatsApp istifadəçilərini naməlum nömrələrdən gələn spam və arzuolunmaz məzmunlardan qorumaqdır. Yeni funksiya tanış olmayan şəxslərin göndərdiyi mesajların sayına məhdudiyyət qoyur. Bu dəyişiklik istifadəçinin əlaqə siyahısında olmayan şəxslərdən məhdud sayda mesaj almasına imkan verəcək.

Yeni qaydalara görə, istifadəçilər əlaqə siyahılarında olmayan şəxslərdən yalnız müəyyən sayda mesaj qəbul edə biləcəklər. Platforma bu məhdudiyyət sayəsində kənar şəxslərin narahatlıq yaratma imkanlarının azalacağını bildirir. Bu, naməlum nömrələr vasitəsilə göndərilən kütləvi mesajların qarşısını almaq üçün tətbiq edilən vacib bir addımdır. Bu qayda ilə tətbiqin daxilindəki ümumi təhlükəsizlik səviyyəsinin artırılması planlaşdırılır.

Məhdudiyyətlər yalnız gələn mesajlara şamil edilmir. Əgər bir istifadəçi cavab almadığı başqa bir şəxsə ardıcıl olaraq mesaj göndərirsə, o da müəyyən məhdudiyyətlə üzləşəcək. Belə bir vəziyyətdə, göndərə biləcəyi mesaj sayı məhdudlaşdırılır. Əgər göndərən tərəf cavab almazsa, onun nömrəsi müəyyən vaxt ərzində bloklanacaq. Bu bloklama yalnız o zaman aradan qaldırılır ki, mesaj göndərmək istədiyi şəxsdən cavab alsın. Bu mexanizm istifadəçilərin bir-birini təqib etməsinin qarşısını almağa yardım edir.