Xalq artisti qəzaya görə konsertini təxirə saldı

Xalq artisti Mənsum İbrahimov bu gün Gəncədə baş tutmalı olan yubiley konsertini təxirə saldığını açıqladı. Muğam ustası bu qərarın səbəbini Türkiyənin Gəncədən qayıdan hərbi təyyarəsinin ötən gün qəzaya uğraması ilə əlaqələndirib. Bu hadisənin yaratdığı dərin ictimai kədəri nəzərə alan sənətçi, əyləncə tədbirini keçirməyi uyğun görməyib.

Konsertin Fikrət Əmirov adına Gəncə Dövlət Filarmoniyasında keçirilməsi planlaşdırılmışdı. Mənsum İbrahimov faciə ilə bağlı kədərini ifadə edərək, şəhidlərin xatirəsinə hörmət göstərdiyini bildirib. O qeyd edib: “Orada 20 hərbçimiz şəhid olub. Türkiyənin şəhidi bizim şəhidimizdir. Acınız acımızdır, əziz Türkiyəm.”

Xalq artisti bütün şəhidlərə rəhmət diləyib və tamaşaçılardan anlayış istəyib. O, konsertin yeni vaxtı ilə bağlı ictimaiyyətə əlavə məlumat veriləcəyini söyləyib.