Yapon alimdən zəlzələ xəbərdarlığı: “Hazır olmalıyıq”

Yaponiyalı alim Yoşinori Morivaki Türkiyəni gözləyən zəlzələ təhlükəsi barədə ciddi xəbərdarlıq edib. Seysmoloq bildirib ki, Egey bölgəsində çox sayda qırılma xətti mövcuddur və bu vəziyyət yüksək risk yaradır. O, həmçinin Bandırma və Bursa vilayətlərinin də risk altında olduğunu qeyd edib. Morivaki Səlcuq Universitetində təşkil edilən konfransda çıxış edərək, Türkiyənin zəlzələ qurbanlarının sayına görə dünyada üçüncü yerdə olduğunu xüsusi vurğulayıb.

Alim Türkiyə və Yaponiyanın geoloji baxımdan oxşar xüsusiyyətlərə malik olduğunu söyləyir, lakin onların arasında fərqlər var. Yaponiyada dörd seysmik lövhə olduğu halda, Türkiyədə altı seysmik lövhə yerləşir. Morivaki bu səbəbdən Türkiyənin geoloji quruluşunun daha mürəkkəb olduğunu vurğulayıb. O qeyd edir ki, "Reallığı qəbul etməliyik. Hər cür təhlükəyə hazır olmalıyıq". Mütəxəssis xatırladıb ki, İndoneziyadan başlayan Şimali Anadolu fay xətti dünyanın əsas fay xətlərindən biridir.

Yoşinori Morivaki ölkədəki tikinti standartları və nəzarət problemlərinə də diqqət çəkib. Türkiyə birinci dərəcəli zəlzələ zonası olmasına baxmayaraq, bəzi əyalətlərdə hələ də lazımi monitorinqlər aparılmayıb. Daha vacib bir məqam isə tikintilərin keyfiyyətidir. Mütəxəssisin sözlərinə görə, Türkiyədə mövcud olan 21 milyondan çox binanın yarısı qanunsuz inşa edilib və tikinti normalarına cavab vermir. Bu vəziyyət zəlzələ zamanı fəlakətin miqyasını xeyli artıra bilər.