Saat 10:00 - Xəbər İcmalı
Şəkidə ağır yol qəzası: 68 yaşlı qadın həyatını itirib. Gecə saatlarında Qaraməryəm-İsmayıllı-Şəki yolunun Köbər Zəyzid kəndi ərazisindən keçən hissəsində Elsevər İsmayılovun idarə etdiyi "Mercedes" markalı minik avtomobili ağaca çırpılıb. Qəzada nəqliyyat vasitəsində olan iki sərnişindən biri - 68 yaşlı qadın hadisə yerində dünyasını dəyişib. Bu, son sutka ərzində ölkədə baş verən ikinci ağır yol qəzasıdır.
ABŞ-nin İrana qarşı hərbi əməliyyatlarının xərcləri 61 milyard dolları keçib. Fevralın 28-dən bəri davam edən əməliyyatlar üçün Amerika xəzinəsindən hər saniyə 11,5 min dollardan artıq məbləğ xərclənir. Eyni zamanda, mətbuatda ABŞ-nin İranın Hörmüz boğazındakı obyektlərinə yeni zərbələr planlaşdırdığı barədə məlumatlar yayılıb.
Türkiyədə iki böyük əməliyyat: narkobaron tutulub, minlərlə silah hissəsi aşkarlanıb. İstanbul polisi beynəlxalq axtarışda olan hindistanlı narkobaron Salim Dolanı Beylikdüzü rayonunda saxlayıb. Bundan ayrıca, İstanbulun Pendik rayonunda yeraltı boş su anbarına gizlədilmiş 3 min 92 ədəd qanunsuz silah hissəsi ələ keçirilib. Hissələrin silah qaçaqmalçılığında istifadə olunacağı müəyyən edilib.
Pakistan Prezidenti Asif Əli Zərdari bu gün Çinə rəsmi səfərə yola düşəcək. Səfər aprelin 25-dən mayın 1-dək davam edəcək. Zərdari əvvəlcə Xunan əyalətinin Çanşa şəhərini, sonra isə Sanya şəhərini ziyarət edəcək.
Rusiya Yunanıstanı Fransa ilə nüvə əməkdaşlığına görə hədələyib. Yunanıstan Fransanın nüvə qoruması altına daxil olmaq planını həyata keçirməkdə qərarlıdır. Moskva isə bu addıma kəskin etiraz edərək, fransız nüvə bombardman təyyarələrinə ev sahibliyi edən bütün Avropa ölkələrinin hərbi hədəfə çevriləcəyini bildirib. Bu açıqlama Afinada ciddi narahatlığa səbəb olub.
Azərbaycan Almaniyada beynəlxalq incəsənət sərgisində uğurla təmsil olunur. Kölndə keçirilən Discovery Art Fair sərgisində 16 ölkədən 117 qalereya iştirak edir, 15 mindən çox ziyarətçi tədbirə qatılıb. Azərbaycan milli stendi xüsusi diqqət çəkib.