Saat 22:00 - Xəbər İcmalı
Qəzzada İsrail hücumları davam edir, atəşkəs dövründə Lübnana da zərbə endirilib. İsrail ordusunun Qəzza Şeridinin şimalındakı polis məntəqəsinə hava hücumu nəticəsində həyatını itirən Filistinlinin kiçik yaşlı oğlunun atasının cəsədi yanında "Ata, vallahi səni çox sevirəm" deyərək göz yaşı tökməsi dünya ictimaiyyətinin diqqətini çəkib. Eyni zamanda, İsrail hərbi qüvvələri atəşkəs müddətində Lübnanın cənubundakı Qərbi Sər şəhərçəsində bir binaya havadan hücum edib. Hücum nəticəsində aralarında uşaqların da olduğu 5 nəfər həlak olub, çox sayda insan yaralanıb. Xilasetmə qrupları dağıntılar altında qalan insanları axtarır.
İran mətbuatı ABŞ ilə danışıqların uğursuzluqla nəticələnə biləcəyi barədə xəbərdarlıq edib. İran yarı rəsmi Fars Xəbər Agentliyinə danışıqlar heyətinə yaxın mənbələr bildirib ki, Pakistan vasitəçiliyi ilə aparılan prosesdə Amerika tərəfi güzəştə getməzsə, müzakirələr tıxanacaq. Bu xəbər, Trump-ın İranla sazişə "çox yaxınlaşdıqlarını" ifadə etdiyi bir vaxtda gəlir və danışıqlar prosesində tərəflərin mövqeləri arasında ciddi fərqin olduğunu göstərir.
Bakıda keçirilən Ümumdünya Şəhərsalma Forumunun 13-cü sessiyası rekord göstəricilərlə başa çatıb. Altı gün davam edən WUF13 forumunda 176 ölkədən 58 min nəfər qeydiyyatdan keçib ki, bu da forumun 24 illik tarixində ən yüksək göstəricidir. Məskunlaşma, iqlimədavamlı urbanizasiya və dayanıqlı inkişaf sahəsində aparılmış müzakirələr nəticəsində Bakı Fəaliyyətə Çağırış sənədi qəbul edilib.
İngiltərə futbolunda tarixi gün - "Hull City" 10 illik aradan sonra Premyer Liqaya yüksəlib. Londondakı "Uembli" stadionunda keçirilən Championship pley-off finalında "Hull City" "Middlesbrough"nu 1:0 hesabı ilə məğlub edib. Matçın yeganə qolunu ikinci hissənin əlavə vaxtının 5-ci dəqiqəsində Oliver Makberni vurub.
Ekologiya naziri Xəzərin su səviyyəsinin azalması barədə açıqlama verib. Nazir Rəşad İsmayılov bildirib ki, Xəzər dənizinin suyunun azalmasının səbəbi yalnız iqlim dəyişiklikləri deyil və bu məsələnin həllində daha geniş yanaşma tələb olunur. Berlində isə Filistinə dəstək aksiyası keçirilib - böyük sayda etirazçı İsrailin işğal siyasətini və Almaniyanın İsrailə silah tədarükünü pisləyib.