19 Yaşlı Elif Sude Akgül Dünya Taekvondo Çempionatında Gümüş Medal Qazandı

Türkiyənin gənc taekvondoçusu Elif Sude Akgül Çində keçirilən Dünya Çempionatında böyük uğur qazanaraq gümüş medalın sahibi oldu. Cəmi 19 yaşı olan idmançı, bu səviyyədə qatıldığı ilk beynəlxalq turnirdə finala yüksəlməyi bacardı. Onun bu nailiyyəti Türkiyə Taekvondo Federasiyası tərəfindən yüksək qiymətləndirildi. Federasiyanın sədri Bəhri Tanrıkulu, çempionatın ardından çıxış edərək idmançını təbrik etdi və onun göstərdiyi əzmkarlığı xüsusi vurğuladı.

Tanrıkulu verdiyi açıqlamada, bu medalın Türkiyənin sözügedən dünya çempionatında qazandığı ilk medal olduğunu bildirdi. O qeyd etdi ki, Elif Sude bu gün həqiqətən qeyri-adi bir performans göstərdi. "Elif bu gün çox böyük bir iş gördü. 19 yaşında ilk dəfə bu səviyyədə mübarizə apardı və finala çıxdı. Ən əhəmiyyətli məqam isə onun zədəli olmasına baxmayaraq son ana qədər mübarizə aparması idi. Ölkəmizə gümüş medal gətirdi. Elif bəlkə rəsmi olaraq gümüş medal qazandı, amma o, artıq 'könüllərin çempionu' oldu," deyə Federasiya sədri idmançının fədakarlığını yüksək qiymətləndirdi.

19 yaşlı taekvondoçu Elif Sude Akgül finala gedən yolda aldığı zədələrə baxmayaraq, həlledici görüşdə Tayvan təmsilçisi Yu-yun Liu ilə qarşılaşdı. O, ilk raundu öz xeyrinə bitirsə də, sonrakı iki raundda rəqibinə uduzdu. Nəticədə qarşılaşmadan 2-1 hesabı ilə məğlub ayrıldı və qadınlar arasında 49 kiloqram çəki dərəcəsində gümüş medala layiq görüldü. Çin Xalq Respublikasının Uksi (Wuxi) şəhərində davam edən çempionatda Türkiyə yığmasının digər üzvləri də mübarizə aparacaqlar. Növbəti yarış günündə qadınlarda 73 kq-da Sude Yaren Uzunçavdar, kişilərdə isə 54 kq-da Furkan Übeydə Çamoğlu və 87 kq-da Orkun Atəşli döyüşəcəklər.