7 Dəqiqəlik Oğurluq: Luvr Muzeyindən Tarixi Zinyət Əşyaları Aparıldı

Fransa Daxili İşlər Naziri Loran Nunez Luvr Muzeyində baş verən oğurluqla bağlı açıqlama yayıb. O bildirib ki, yerli vaxtla təxminən saat 09:30 radələrində üç və ya dörd nəfər oğru pəncərəni sındıraraq Apollon Qalereyasına daxil olublar. Bu hadisə qısa zamanda dünya gündəminə çevrilib. Nazir qeyd edib ki, oğrular binanın xaricində olan yük maşınının liftindən istifadə edərək muzeyə yol tapıblar. Bu hadisənin təxminən yeddi dəqiqə ərzində həyata keçirildiyi ehtimal edilir.

Nunezin sözlərinə görə, cinayətkarlar içəri daxil olduqdan sonra vitrinlərdə sərgilənən müxtəlif qiymətli zinyət əşyalarını götürüblər. Onlar hadisə yerindən motosikletlərlə qaçıblar. Fransa Daxili İşlər Naziri oğurlanan əşyaların dəyərinə toxunaraq, onların ticari qiymətindən qat-qat üstün, ölçülməsi mümkün olmayan tarixi və mədəni əhəmiyyətə malik olduğunu vurğulayıb. Hazırda səlahiyyətli orqanlar oğurlanan əşyaların dəqiq siyahısını tərtib edirlər.

Paris Prokurorluğu bu hadisə ilə əlaqədar dərhal araşdırmalara başlayıb. Prokurorluq açıqlayıb ki, istintaq “mütəşəkkil oğurluq və cinayət törətmək üçün yaradılmış cinayətkar təşkilat” şübhəsi ilə aparılır. İstintaq prosesi mədəni sərvətlərin qanunsuz qaçaqmalçılığına qarşı mübarizə aparan xüsusi bir polis bölməsi tərəfindən idarə olunur. Hadisə ilə bağlı olaraq, Fransa polisi Luvr Muzeyinə aparan əsas yolları bağlayıb və təhlükəsizlik tədbirlərini gücləndirib.