ABŞ Konqresi Epşteyn Dosyalarını Açır: Tramp Milyarderin Sualları Qarşısında Jurnalistə Həddini Bildirdi

ABŞ Prezidenti Donald Tramp Səudiyyə Ərəbistanının Vəliəhd Şahzadəsi Məhəmməd bin Salmanı Ağ Evdə qəbul etməzdən əvvəl mətbuat konfransı keçirib. Toplantıda jurnalistlərin suallarını cavablandıran Trampa, 2019-cu ildə həbsxanada müəmmalı şəkildə ölən, cinsi istismar cinayətkarlığı ilə məhkum edilmiş milyarder Ceffri Epşteynlə olan keçmiş əlaqələri barədə sual verilib. Bu sual Trampın kəskin reaksiyasına səbəb olub. ABŞ Prezidenti cavabında, Epşteyni "xəstə bir manyak" olduğu üçün klubundan qovduğunu və onunla heç bir əlaqəsinin olmadığını iddia edib. Bununla yanaşı, Tramp sualı verən ABC telekanalının müxbirini açıq şəkildə tənqid edərək, medianı saxtakarlıqda ittiham edib. Prezident, ABC-nin yayım lisenziyasının ləğv edilməli olduğunu, çünki xəbərlərinin "saxta və tamamilə yanlış" olduğunu bildirib. O, hətta ABC-ni "bərbad şirkət" adlandıraraq, onu cinayətə ortaq olmaqda günahlandırıb.

Bu gərginlik fonunda, ABŞ Təmsilçilər Palatası azyaşlı qız uşaqları üçün fahişəlik şəbəkəsi qurmaq ittihamı ilə həbsdə ölmüş milyarder Ceffri Epşteyn haqqındakı bütün sənədlərin ictimaiyyətə açıqlanmasını nəzərdə tutan qanun layihəsini qəbul edib. "Epşteyn Dosyalarının Şəffaflığı Qanunu" adlı bu sənəd Təmsilçilər Palatasında demək olar ki, yekdilliklə, 427 "lehinə" və cəmi bir "əleyhinə" səslə qəbul edilib. Bu nəticə ilə, Amerikan ictimaiyyətinin uzun müddət cavabını gözlədiyi Epşteyn sənədlərinin açılması istiqamətində Konqresdə ilk mühüm addım atılmış oldu. Bu hadisə həm də Respublikaçıların çoxluq təşkil etdiyi Konqresin, sənədlərin ictimaiyyətə açıqlanması barədə fikrini dəyişən Prezident Trampdan sonra hərəkətə keçməsi baxımından diqqət çəkir.

Layihənin qanuni qüvvəyə minməsi üçün növbəti dayanacaq ABŞ Senatıdır. Əgər Senat da sənədi təsdiqlərsə, layihə imzalanmaq üçün Ağ Evə göndəriləcək. Sənəd Donald Trampın imzası ilə təsdiqlənərsə, qanuniləşəcək və ABŞ Ədliyyə Nazirliyi tərəfindən saxlanılan bütün Epşteyn işi sənədlərinin açıqlanmasını məcburi edəcək. Xatırladaq ki, Epşteyn ən kiçiyi 14 yaşında olan onlarla azyaşlı qıza qarşı cinsi istismar və fahişəlik şəbəkəsi qurmaq ittihamları ilə mühakimə olunurdu. O, Nyu Yorkdakı Manhetten Həbsxanasında, kamerasında 10 avqust 2019-cu ildə ölü tapılmışdı.

Epşteynin məhkəmə işi materiallarında adı keçən şübhəli əlaqələri olan məşhurlar arasında Şahzadə Endryu, Prezident Donald Tramp, keçmiş ABŞ Prezidenti Bill Klinton, keçmiş İsrail Baş naziri Ehud Barak, aktyor Kevin Speysi, müğənni Maykl Cekson və illüziyonist Devid Kopperfild kimi tanınmış simalar yer alırdı. Lakin ABŞ Federal Təhqiqatlar Bürosu (FBI) Ədliyyə Nazirliyi ilə apardığı yoxlamanın nəticəsində, məşhurlardan ibarət xüsusi "müştəri siyahısının" olduğuna dair heç bir dəlil tapılmadığını bəyan etmişdi. FBI rəsmiləri, hökumət şəxslərinin və iş adamlarının cinayətin ortağı olduğu iddiasını ört-basdır etmək üçün qətlə yetirildiyi iddia olunan Epşteynin əslində kamerasında intihar etdiyi qənaətinə gəldiyini bildirib. Buna baxmayaraq, amerikalı jurnalist Taker Karlson da daxil olmaqla, bəzi şəxslər Epşteynin "İsrail üçün işlədiyini" və bu faktın Vaşinqtonda hər kəsə bəlli olduğunu iddia etmişdi. Həmçinin, “Wall Street Journal” qəzeti Epşteynin sevgilisi Ghislaine Maxwellin onun 50 illiyi üçün dostlarından məktub yazmağı xahiş etdiyini və bu məktublardan birinin Trampa aid olduğunu irəli sürmüşdü.