Argentinada parlament seçkiləri: Prezident Javier Milei-nin partiyası qələbə qazandı

Argentinada keçirilən parlament seçkilərində Prezident Javier Milei-nin rəhbərlik etdiyi hakim "La Libertad Avanza" partiyası böyük uğur qazandı. Yerli mətbuata əsasən, səslərin 96 faizi hesablandıqdan sonra Milei-nin "İrəliyə Azadlıq" partiyası 39 faiz səs toplayaraq seçkilərdən qalib çıxdı. Əsas müxalifət olan Peronistlərin "Fuerza Patria" ("Vətən Gücü") koalisiyası isə səslərin 29,4 faizini götürə bildi. Hakim partiya yalnız paytaxt Buenos Ayresdə deyil, Kordoba, Santa Fe və Mendoza kimi digər mühüm əyalətlərdə də önəmli nəticələr əldə etdi. Müxalifət 7 sentyabrda keçirilən əyalət seçkilərində uğur qazandığı Buenos Ayresdə isə gözlənilməz məğlubiyyət yaşadı.

Bu nəticələr hakimiyyətə islahat layihələrini həyata keçirmək üçün ciddi bir üstünlük verdi. Həmçinin, müxalifətin prezident fərmanlarını əngəlləmək cəhdlərini səmərəsizləşdirmək imkanı yarandı. Baxmayaraq ki, "La Libertad Avanza" Senatda səkkiz seçki bölgəsindən altısını qazandı, partiya hələ də kəmərsıxma siyasətlərini keçirmək üçün zəruri olan üçdə bir səlahiyyətə çata bilməyib. Milli mediaya görə, hakim partiyanın Nümayəndələr Palatasında qazandığı uğurlar Milei-nin iqtisadi proqramlarını irəli aparmağa imkan versə də, Senatdakı bu çatışmazlıq bəzi qanunları ləğv etmək və ya bloklamaq səlahiyyətlərini məhdudlaşdırır.

Seçkiyə qatılım faizi 67,85 olub ki, bu göstərici Argentinada 1983-cü ildə demokratiyaya qayıdışdan bəri qeydə alınan ən aşağı göstəricidir. Buenos Ayresdəki partiya qərargahında çıxış edən Prezident Milei yeni Konqresin ölkənin istiqamətini dəyişməkdə mühüm rol oynayacağını bildirdi. O, bu günü "Argentina üçün açıq şəkildə tarixi bir gün" adlandıraraq, "qarşıdakı iki il ərzində başladığımız islahat yolunda irəliləməyə davam etməliyik" dedi. Milei, dekabrın 10-dan etibarən Argentina tarixindəki ən islahatçı Konqresə sahib olacaqlarını ifadə edib. Qeyd olunur ki, Milei-nin ifrat sağçı ritorikası və radikal iqtisadi vədləri cəmiyyətdə həm güclü dəstək, həm də ciddi qarşıdurma reaksiyalarına səbəb olmuşdur. Ənənəvi Peronist partiyaların bu məğlubiyyəti isə müxalifətin siyasi təsirinin müvəqqəti azalmasını göstərir.