BBP sədri Dəsticidən DEM Partiyasının üzvü Buldanın "Öcalan" açıqlamasına kəskin reaksiya

Böyük Birlik Partiyasının (BBP) sədri Mustafa Dəstici, DEM Partiyasının İmralı nümayəndə heyətinin üzvü və TBMM sədr müavini Pervin Buldanın terror təşkilatı PKK-nın rəhbəri Abdullah Öcalanın "Terrorsuz Türkiyə" prosesi ilə bağlı mediadakı bəzi şərhlərdən narahat olduğu barədə açıqlamalarına sərt reaksiya verib.

"BU, ARTIQ DÖVLƏT HAKİMİYYƏTİNƏ BİRBAŞA MEYDAN OXUMAĞIN MÖVZUSUDUR"

Dəstici sosial media hesabından verdiyi açıqlamada bunları qeyd edib: "Dünənə qədər camaat içinə çıxa bilməyən bu "saxta sülh" tərəfdarları Həll Prosesi imkanlarını öz maraqlarına uyğunlaşdıraraq həddi aşırlar. İndi də mətbuat quruluşuna müdaxilə etməyə cəhd edirlər. İmralıdakı körpə qatilinin özü və sözdə "Həll Prosesi" ilə bağlı xəbərlərin bəzilərindən "narahat olduğunu" söyləmək və bu narahatlığa səbəb olan məzmunun qarşısının alınmasının "hakimiyyətin vəzifəsi" olduğunu dilə gətirmək; artıq fikir azadlığının yox, birbaşa dövlət hakimiyyətinə meydan oxumağın mövzusudur."

"AÇIQ ŞƏKİLDƏ TERROR TƏŞKİLATININ TƏLƏBLƏRİNİN NORMALLAŞDIRILMASINA VƏ QƏBULUNA ÇAĞIRIŞDIR"

Yəni bir terror təşkilatının başçısı artıq patoloji xarakterli sayıqlamaları ilə tək Türkiyəyə və Yaxın Şərqə yön verməyə cəhd etmir; eyni zamanda bu ölkənin mətbuat quruluşuna da yön vermək cəsarətini və hədsizliyini göstərir! Halbuki Türkiyədə mətbuatın vəzifəsi bir terrorçunun emosional rahatlığını təmin etmək deyil, millətin həqiqəti bilmək haqqını qorumaqdır. Mətbuat azadlığı İmralının kefi üçün yox; şəhidlərin qanını, qazilərin fədakarlığını, millətinin yaddaşını yaşatmaq üçün var. Dövlətin media dilini terror təşkilatının rəhbərinin tələbləri istiqamətində formalaşdırmasını istəmək, açıq şəkildə terror təşkilatının tələblərinin normallaşdırılması və qəbul edilməsi çağırışıdır.

"CANİ BİR MƏHKUMUN RAHATLIĞINI DÜŞÜNMƏK, MİLLİ BİR PROBLEM SAHƏSİDİR"

Əsl "narahat" olması lazım olanlar, ekran qarşısında övladının xəbərini izləyən şəhid analarıdır; dağda, sərhəddə, əməliyyat sahəsində bu Vətən üçün can verən qəhrəman əsgərlərimizdir. Bu Vətənə sadəcə şəxsiyyət vəsiqəsi ilə deyil, qəlbi ilə bağlı olanların səbrini, acısını, qətiyyətini yox sayıb; qırx il boyu bu millətə və dövlətə "xəyanət" etmiş cani bir məhkumun rahatlığını düşünmək, milli bir problem sahəsidir. Və buna qətiyyən göz yumulmaz.

BULDAN NƏ DEMİŞDİ?

Bir televiziya kanalına verdiyi açıqlamada, terror təşkilatı PKK-nın rəhbəri Abdullah Öcalanın "Terrorsuz Türkiyə" prosesi ilə bağlı mediadakı bəzi şərhlərdən çox narahat olduğunu bildirən DEM Partiyasının üzvü Pervin Buldan, bu ifadələri işlətmişdi: "Cənab Öcalan son görüşdə çox narahat olduğu bir məsələ üzərində dayandı. Ciddi tənqidləri var. Hələ də bir çox kanalın və şərhçinin keçmişdəki düşmən dilini davam etdirdiyini və bu çevrələrin dərdinin həll və sülh olmadığını, quru sözlər (hamaset) və düşmənçilik olduğunu açıq şəkildə ifadə etdi. Bəzi şərhçilərin, xəbərçilərin, kanalların prosesin əleyhinə şərhlər, ifadələr işlətməsi bizim həll edəcəyimiz bir problem deyil. Çünki baxdığımızda bu gün media da hökumətin əlindədir, məhkəmə də AKP-nin əlindədir. Hər gücü olan, həyatın hər sahəsinə hakim olan bir iqtidardan danışırıq. Buna görə də bütün bunları yaxşılaşdırmaq, aradan qaldırmaq yenə də iqtidarın vəzifəsidir. Amma bu mövzuda da bir irəliləyiş qeydə alınmadığını bildirmək istəyirəm."