Ceffri Epşteynin Sənədləri Açıqlandı: Qəzzaya Dəstək Verən Məşhurlar "İsrail Əleyhdarı" Kimi Qara Siyahıya Salınıb

ABŞ-lı cinsi cinayətkar və pedofil Ceffri Epşteynə aid yazışmaların da daxil olduğu sənədlər ictimaiyyətə təqdim edildikdən sonra hər gün yeni bir qalmaqala səbəb olur. Açıqlanan sənədlər arasında Epşteynə göndərilmiş maraqlı bir mətbuat bülleteni də yer alıb. Bu bülletendə Qəzzaya dəstək verən dünya şöhrətli simaların "İsrail əleyhdarı" kimi qara siyahıya salındığı ortaya çıxdı. Bu məlumatların Epşteynin dosyalarında aşkarlanması ciddi reaksiyalara səbəb olub.

Sənədlərin içərisindən çıxan diqqət çəkən yazışmalardan biri Yəhudi Xəbər Agentliyi (Jewish News Syndicate - JNS) tərəfindən hazırlanmış mətbuat bülleteni idi. Epşteynə 6 avqust 2014-cü il tarixində göndərilən bu e-poçtda, o dövrdə Qəzzada baş verənlərə reaksiya göstərən bir çox məşhurun "İsrail əleyhdarı məşhurlar" başlığı altında fişləndiyi görünürdü. Bülletendə, Fələstinə dəstək verdikləri üçün aktrisa Penelopa Kruz, aktyor Xavyer Bardem, müğənni Zeyn Malik və Denni Qlover kimi tanınmış simaların bu cür təsnif edildiyi göstərilirdi. Sənəddə bu məşhurların əməkdaşlıq etdiyi böyük markalar da xüsusi olaraq qeyd olunmuşdu.

JNS bülletenində, həmin vaxtlarda Qəzzadakı vəziyyətə görə səslərini qaldıran adlar bir-bir sadalanırdı. Məsələn, Stivi Uonder İsrail Müdafiə Qüvvələrini dəstəkləyən tədbirdən geri çəkildiyi üçün siyahıya salınmışdı. Emma Tompson, İsrailin "Habima" Teatrının Londondakı tamaşalarını boykot etməyə çağıran açıq məktubu imzalamışdı. Rocer Uoters isə uzun illərdir Fələstin tərəfdarı olan BDS hərəkatına verdiyi dəstək və İsrail siyasətinə qarşı sərt tənqidləri səbəbindən siyahıda yer alırdı. Həmçinin, aktyor Dastin Hoffmanın İsrail siyasətinə yönəlik tənqidlərinin əsas götürüldüyü qeyd olunurdu.

Penelopa Kruz və Xavyer Bardem isə birlikdə İsrailin Qəzza əməliyyatlarını tənqid edən bəyanata imza atdıqları üçün siyahıya daxil edilmişdilər. Sənədlərdə xüsusilə Zeyn Malikə ayrılan hissə diqqət çəkirdi. Həmin dövrdə "One Direction" qrupunun üzvü olan Malik, İsrail və HƏMAS arasındakı qarşıdurmalar zamanı Twitter hesabında #FreePalestine (Fələstinə Azadlıq) etiketi ilə paylaşım etmişdi. Eyni etiketi paylaşsa da, sonradan paylaşımını silən Rihannadan fərqli olaraq, Malik öz paylaşımını silməmişdi və bu yazı təxminən 200 min dəfə təkrar paylaşılmışdı.