Çin Səfiri Bahçəlinin Türkiyə-Rusiya-Çin İttifaqı Təklifini Qeyd Etdiklərini Açıqladı

Çinin Ankaradakı səfiri Ciang Şüebin Türkiyə-Çin əlaqələri, ABŞ ilə gedən ticarət müharibəsi və MHP sədri Dövlət Bahçəlinin irəli sürdüyü "Türkiyə-Rusiya-Çin ittifaqı" təklifi ilə bağlı mühüm şərhlər verib. Səfir, CNN Türk-ə verdiyi müsahibədə Bahçəlinin gündəmə gətirdiyi bu ideyanın Çin tərəfindən diqqətlə izləndiyini bildirib. Şüebin, "Cənab Bahçəlinin təklifini qeydə aldıq və bu mövzuda aparılan müzakirələri izləməyə davam edirik," deyə qeyd edib. O, Çinin artıq uzun müddətdir ki, Türkiyə və Rusiya ilə xüsusən Fələstin-İsrail məsələsində iki dövlətli həll prinsipi əsasında dialoq aparmaqda olduğunu vurğulayıb.

Səfir Şüebin, üç ölkə arasında mövcud olan əməkdaşlıq mexanizmlərinə toxunaraq, Çinin Şanxay Əməkdaşlıq Təşkilatı (ŞƏT), BRICS və G20 kimi beynəlxalq platformalarda Türkiyə və Rusiya ilə yaxın işbirliyi içində olduğunu bildirib. O, gələcəkdə bu təmasların daha da gücləndiriləcəyini ifadə edib. ABŞ ilə yaşanan gərginliyə toxunan Şüebin, Çinin tərəf olaraq ticarət müharibəsi başlatmaq istəmədiyini, lakin ABŞ-ın atdığı səhv addımlara qarşı qanuni əks-tədbirlər görmək məcburiyyətində qaldıqlarını söyləyib. Səfir, Çinin nadir torpaq elementlərinin ixracına tətbiq etdiyi nəzarət tədbirlərinin beynəlxalq öhdəliklər çərçivəsində atılmış qanuni addım olduğunu və bunun qlobal təchizat zəncirinə təsirinin cüzi olacağını əlavə edib.

Çin, Türkiyənin Yaxın Şərqdəki rolunu və regional böhranların nizamlanması yolunda göstərdiyi səyləri yüksək qiymətləndirdiklərini dilə gətirib. Şüebin, həm Fələstin, həm Ukrayna, həm də Suriya mövzularında Türkiyə ilə oxşar mövqelərə malik olduqlarını qeyd edib. O, sülhün və sabitliyin təmin edilməsi məqsədilə kommunikasiya və koordinasiya səviyyəsini artırmağa hazır olduqlarını söyləyib. Səfir, Fələstin üçün "iki dövlətli həll", Ukrayna üçün "danışıqlar yolu ilə sülh" və Suriya üçün "suverenliyin və ərazi bütövlüyünün qorunması" kimi əsas prinsiplərə sadiq qaldıqlarını bildirərək, Çinin Türkiyə ilə bu sahələrdə əməkdaşlığı dərinləşdirmək niyyətində olduğunu vurğulayıb.