Donald Tramp Ceffri Epstein Sualına Kəskin Reaksiya Verdi: "Sən Rəzil Jurnalistsən, Lisenziyanız Ləğv Edilməlidir"

ABŞ Prezidenti Donald Tramp Ağ Evdə Səudiyyə Ərəbistanının Vəliəhd Şahzadəsi Məhəmməd bin Salman ilə görüşüb. Prezident Şahzadəni Ağ Evin bağçasında qarşılayıb; qarşılama mərasimi zamanı Ağ Evin səmasında təyyarələr görünüb. Liderlərin Oval Ofisdə birgə bəyanatlar verməzdən əvvəl Ağ Evin bağçasında gəzərək söhbət etdikləri bildirilir. Ancaq görüşlə bağlı rəsmi bəyanatlar diqqət mərkəzində olsa da, Trampın açıqlamaları milyarder Ceffri Epsteinlə bağlı ona ünvanlanan bir sualdan sonra daha çox gündəmə gəlib.

Tramp, fahişə şəbəkəsi yaratmaq ittihamı ilə mühakimə olunduğu zaman həbsxanada ölü tapılan milyarder Ceffri Epsteinin məhkəmə dosyelərində adının hallanması iddiaları ilə bağlı sual verən ABC televiziyasının müxbirinə sərt reaksiya göstərdi. Prezident, sualı verən jurnalisti kəskin şəkildə pisləyib. Tramp jurnalistə müraciət edərək, “Sən dəhşətli bir insansan, pis bir jurnalistsən, rəzilsən,” deyib və əlavə edib: “ABC-nin yayım lisenziyası ortadan qaldırılmalıdır. Yayım hüquqlarınız əlinizdən alınmalıdır. Siz yalan xəbər yayırsınız. Heç etibarlı deyilsiniz. Gedin Epsteindən pul alan demokratları araşdırın.” Bu kəskin cavab mətbuat konfransına damğa vurub.

Epsteinin işi ilə bağlı məsələlərə gəldikdə, o, ən azı 14 yaşında olan onlarla qıza qarşı cinsi istismar və fahişə şəbəkəsi yaratmaq ittihamları ilə Nyu Yorkun Manhetten Metropoliten Mərkəzi Həbsxanasında saxlanılırdı. O, 2019-cu il avqustun 10-da öz kamerasında ölü tapılmışdı. Açıqlanan məhkəmə sənədlərində bir çox yüksək vəzifəli şəxsin və məşhurun adı keçirdi. Bu siyahıda Şahzadə Endryu, ABŞ-ın keçmiş Prezidenti Bill Klinton, İsrailin keçmiş Baş naziri Ehud Barak, aktyor Kevin Speysi, müğənni Maykl Cekson, illüziyonist Devid Kopperfild və Donald Tramp kimi tanınmış şəxslərin adları hallanırdı.

ABŞ Federal Təhqiqatlar Bürosu (FBI) ABŞ Ədliyyə Nazirliyi ilə birgə apardığı araşdırmada məşhur simalardan ibarət olan iddia edilən "müştəri siyahısı"nın varlığına dair heç bir sübut tapa bilmədiyini açıqlayıb. Rəsmi nəticə ondan ibarət idi ki, hökumət rəsmiləri, məşhurlar və iş adamları daxil olmaqla, yüksək səviyyəli şəxslərin cinayət ortaqlığının üstünü örtmək məqsədilə öldürüldüyü irəli sürülən Epstein, əslində hücrəsində intihar edib. Qeyd etmək lazımdır ki, amerikalı jurnalist Taker Karlson, Epsteinin "İsrail üçün çalışdığını" və Vaşinqtondakı hər kəsin eyni fikirdə olduğunu, lakin bunu açıq demədiyini iddia etmişdi. "Wall Street Journal" qəzeti isə Epsteinin rəfiqəsi Qisleyn Maksvellin onun 50 illiyi münasibətilə tanışlarından məktub yazmasını istədiyini və bu məktublardan birinin Trampa aid olduğunu yazmışdı.