Dünyanın gözü Qəzzadadır! İsrailli girovların azad edilməsinə saat 08:00-da başlanılacaq

İsrail hökuməti bu gün verdiyi açıqlamada, Qəzzada saxlanılan girovların səhər tezdən azad ediləcəyini bildirib. Hökumətin sözçüsü qeyd edib ki, "sağ qalan 20 girovun bir dəfəyə, birlikdə sərbəst buraxılmasını gözləyirik." Sözçü, canlı girovlar təhvil alındıqdan sonra, həyatını itirmiş 28 girovun da cəsədlərini təhvil almağa hazır olduqlarını deyib. Hökumət nümayəndəsi onu da əlavə edib ki, bütün girovlar geri qaytarıldıqdan sonra fələstinli məhbuslar sərbəst buraxılacaq.

GİROVLARIN AZAD EDİLMƏSİ SAAT 08.00-DA BAŞLAYACAQ
İsrail mətbuatı girovların saat 08.00-da Netzarim Dəhlizində sərbəst buraxılacağını yazıb. Xəbərlərə görə, iki saat sonra da həlak olan girovların cəsədləri təhvil veriləcək. Girovların ailələri də əllərində İsrail bayraqları ilə yaxınlarını gözləyirlər. Qəzzadan başlayaraq Re’imdə bitən Netzarim Dəhlizindən sərbəst buraxılan girovlar, ailələri ilə görüşüb evlərinə qayıdacaqlar.

İsrailli bir rəsmi şəxs "Jerusalem Post"a açıqlamasında, HƏMAS-ın bütün girovları azad edəcəyini açıqladığını xatırladaraq, yalnız 20 girovun buraxılmasının ziddiyyət yaratdığını iddia edib. "Wall Street Journal"ın məsələyə yaxın mənbələrə əsaslandırdığı xəbərə görə, HƏMAS 20 girovun sağ olduğunu təsdiqləyib. HƏMAS sağ qalan girovların təhvil verilməsində problem olmadığını bildirsə də, həyatını itirənlərin cəsədlərinin tapılmasının vaxt ala biləcəyini söyləmişdi.

İSRAİL QƏZZA TUNELLƏRİNİ DAĞITMAQ İSTƏYİR
İsrailin Müdafiə Naziri İsrael Katz bu səhər "X" sosial şəbəkəsində etdiyi paylaşımda, girovlar geri qayıtdıqdan sonra İsrailin əsas prioritetinin HƏMAS tunellərinin məhv edilməsi olacağını söyləyib. Katz öz paylaşımında bunları qeyd edib: "Girovların qaytarılması mərhələsindən sonra İsrailin qarşılaşacağı ən böyük çətinlik, HƏMAS-ın Qəzzadakı bütün terror tunellərinin birbaşa İsrail Müdafiə Qüvvələri tərəfindən, həmçinin ABŞ-ın rəhbərliyi və nəzarəti altında yaradılacaq beynəlxalq mexanizm vasitəsilə imha edilməsi olacaq. İsrail Müdafiə Qüvvələrinə bu tapşırığı yerinə yetirməyə hazırlaşmaları barədə göstəriş vermişəm."

GİROVLAR BURAXILDIQDAN SONRA SÖZLƏR TUTULACAQMI?
Cümə günü qüvvəyə minən razılaşmaya əsasən, HƏMAS İsrailin tamamilə geri çəkilməsi barədə razılığa gəlinmədən girovları təhvil verməyə razılaşıb. HƏMAS-dan olan iki fələstinli rəsmi şəxs bunun riskli bir "qumar" olduğunu etiraf ediblər, çünki ABŞ Prezidenti razılaşmaya o qədər sadiqdir ki, onun uğursuzluğuna imkan verməyəcək. "Reuters" agentliyinin xəbərinə görə, HƏMAS rəsmilərindən biri bildirib ki, "HƏMAS liderləri oynadıqları qumarın əks nəticə verə biləcəyinin fərqindədirlər."
Xəbərdə qeyd olunur ki, girovlar sərbəst buraxıldıqdan sonra, ABŞ Prezidenti Trampın komandasının yaxından iştirak etdiyi 2025-ci ilin yanvar ayında atəşkəsdən sonra olduğu kimi, İsrailin hərbi əməliyyatlarına yenidən başlaya biləcəyindən qorxulur. HƏMAS rəsmilərindən biri "Reuters"ə açıqlamasında Trampın həvəsinin konfrans mərkəzində "ağır" şəkildə hiss olunduğunu deyib. Yüksək rütbəli ABŞ rəsmisi bildirib ki, Tramp marafon iclası zamanı şəxsən üç dəfə zəng edib və onun kürəkəni Cared Kuşner və elçi Stiv Vitkof İsrail və Qətər danışıqçıları arasında fəal şəkildə vasitəçilik ediblər.

PLANIN NÖVBƏTİ MADDƏLƏRİ NECƏ OLACAQ?
Bu proses HƏMAS-ın 7 oktyabr 2023-cü ildə İsrailə hücumu ilə başlayan müharibəyə son qoyulmasına yol aça bilər, lakin Trampın 20 maddəlik Qəzza planında nəzərdə tutulan sonrakı mərhələlərin həyata keçiriləcəyinə dair qətiyyət yoxdur. Lakin danışıqlarda iştirak edən iki fələstinli rəsmi şəxs və başqa bir mənbə bildirib ki, Trampın həm Qətərə edilən hücumlara, həm də iyun ayında İsrailin İranla 12 günlük müharibəsinə son qoyan atəşkəsə dair mövqeyi, HƏMAS danışıqçılarına ABŞ Prezidentinin girovlar azad edilən kimi İsrailin yenidən müharibəyə başlamasına icazə verməyəcəyinə dair inam yaradıb.

Vaşinqtondakı mənbəyə görə, Trampın məsləhətçiləri Qətərə hücuma görə Netanyahunun qəzəbini İsrail lideri Netanyahunu Qəzza müharibəsinə son qoymaq üçün bir çərçivə qəbul etməyə məcbur etmək üçün istifadə etmək fürsəti görüblər. Ağ Evin yüksək rütbəli rəsmisi diplomatik və iqtisadi siyasət baxımından Körfəz ölkələri ilə əhəmiyyətli əlaqələr quran Trampın Qətər Əmirini dost olaraq gördüyünü və hücum görüntülərinin televiziyada yayımlanmasından narazı olduğunu bildirib, hücumu Ərəb dünyasını bir araya gətirən mühüm dönüş nöqtəsi kimi xarakterizə edib.

Qəzzadakı fələstinli rəsmi şəxs danışıqlar və vasitəçilik səyləri haqqında deyib ki, Trampın Qətərə bir daha İsrail hücumu olmayacağı barədə ictimaiyyətə verdiyi söz, HƏMAS və digər regional aktorların gözündə ona etibarlılıq qazandırıb. İsraildəki Bar-İlan Universitetinin Siyasi Elm Departamenti rəhbəri Conatan Reynold (Jonathan Reinhold) isə bildirib ki, "Qətərə İsrailin onlara bir daha hücum etməyəcəyinə dair təhlükəsizlik zəmanəti verməsi, HƏMAS-ın atəşkəsin qalıcı olacağına olan inamını artırdı."