Əziz Yıldırımın "Dearsan" Zavodu Qətər üçün ilk raket gəmisini suya buraxdı

İş adamı və "Fənərbaxça" futbol klubunun keçmiş rəhbəri Əziz Yıldırıma məxsus "Dearsan" Gəmiqayırma Zavudu Qətər Hərbi Dəniz Qüvvələri üçün üzərinə götürdüyü sürətli hücum gəmisi layihəsində mühüm mərhələni müvəffəqiyyətlə başa çatdırıb. Şirkət söz verdiyi kimi, layihənin ilk gəmisini rəsmi mərasimlə suya endirdi. Bu uğur "Dearsan"-ın beynəlxalq müqavilələri vaxtında və yüksək keyfiyyətlə yerinə yetirmək bacarığını nümayiş etdirir.

Qətər üçün nəzərdə tutulan bu mühüm işin müqaviləsi 21 İyun 2023-cü ildə Dohada imzalanmışdı. Sazişə əsasən, "Dearsan" Gəmiqayırma Zavudu Qətər Hərbi Dəniz Qüvvələri üçün ümumilikdə 2 ədəd 50 metrlik Raketlə Təchiz Olunmuş Hücum Gəmisi istehsal etməyi öhdəsinə götürmüşdü. İlk gəminin suya buraxılması ilə bağlı mərasim uğurla baş tutdu. Əldə edilən məlumatlara görə, mütəxəssislər hazırda ikinci gəminin inşası üzərində fəal şəkildə işləməyə davam edirlər.

İstehsal edilən yeni növ hücum gəmilərinin texniki göstəriciləri olduqca diqqət çəkir. Gəmilərin tam uzunluğu 50.76 metr, eni 9.53 metr, suya oturumu isə 2.10 metr təşkil edir. Bu gəmilər maksimal olaraq 36 düyün sürətə çata bilir və 1000 dəniz mili qədər hərəkət etmək imkanına malikdir. Yüksək manevr qabiliyyəti ilə seçilən bu hücum gəmiləri eyni zamanda təkmilləşdirilmiş radar sistemləri və ən müasir silah sistemlərinin inteqrasiyası ilə təchiz edilib. Bu xüsusiyyətlər onları Qətər donanması üçün güclü və müasir bir əlavəyə çevirir.