Finlandiyada Daşınmaz Əmlak Fondları Donduruldu: On minlərlə İnvestor Əmanətlərinə Çata Bilmir

Şimali Avropa ölkəsi olan Finlandiya iqtisadiyyatının 2023-cü ildə texniki tənəzzülə girməsi və 2024-cü ildə bərpa əlamətləri göstərməməsi, ölkənin daşınmaz əmlaka yönəlmiş investisiya fondlarında ciddi zəiflikləri ortaya çıxardı. Mənzil qiymətlərinin dəyər itirməsi və bazardakı durğunluq, illərlə aşağı riskli seçim kimi təqdim edilən bu fondların ödəmə qabiliyyətini zəiflətdi. Nəticədə, ölkədə fəaliyyət göstərən ən azı 10 daşınmaz əmlak fondu investorların pul çıxarma tələblərinə məhdudiyyətlər tətbiq etmək məcburiyyətində qaldı. Bu vəziyyət minlərlə insanın şəxsi əmanətlərinə girişini mümkünsüz edib.

Bu maliyyə gərginliyi ilk dəfə 2023-cü ilin sentyabrında Finlandiyanın köklü banklarından olan Alandsbanken tərəfindən idarə olunan mənzil fondunda özünü göstərdi. Artan faiz dərəcələri və dərin çöküş yaşayan mənzil bazarı səbəbindən fond, tələb olunan ödənişləri qarşılamaq üçün kifayət qədər nağd pul tapa bilmədi. Bu səbəbdən pul çıxarma əməliyyatlarını müvəqqəti dayandırmaq qərarı verildi. Portfeli 700 milyon Avrodan çox olan fond, daşınmaz əmlakı çox aşağı qiymətə satmaqdan qaçmaq üçün tələsik hərəkət etməməyə qərar verdi. Lakin bu strategiya, fonddakı investorlara ediləcək ödənişlərin uzanması ilə nəticələndi.

Alandsbanken nümunəsindən sonra, ölkənin ən böyük maliyyə qurumlarından biri olan OP Bank da 2024-cü ilin sonuna doğru oxşar məhdudiyyətlər tətbiq etdi. Bankın bu qərarı təxminən 56 mindən çox investora təsir etdi. Fond rəhbərlikləri müdafiə edirlər ki, onlar bazarın bərpasını gözləyirlər və daşınmaz əmlakın tələsik satışı daha böyük maliyyə zərərinə səbəb olacaq. Baxmayaraq ki, investorların vəsaitlərinə çatma müddəti uzanır, fondlar bu prosesdə idarəetmə haqlarını yığmağa davam edirlər.

Finlandiyadakı maliyyə nəzarəti qurumları isə yaranmış bu vəziyyətə yalnız nəzarət etdiklərini bildirirlər. Onlar mövcud tənzimləmələrin onların müdaxilə etmək səlahiyyətlərini məhdudlaşdırdığını əsas gətirirlər. Daşınmaz əmlak fonlarının bağlanması, Finlandiya iqtisadiyyatında tənəzzülün dərinləşdiyini və mənzil bazarlarında yaranmış ciddi etimad böhranını açıq şəkildə göstərir.