İsrail və Suriya sülh danışıqları yekunlaşır: Hermon Dağında birgə hərbi mövcudluq planı

İsrail və Suriya arasında aparılan uzunmüddətli sülh danışıqları yekunlaşma mərhələsinə çatıb. Əldə edilən razılaşmaya görə, Cəbəl-i Şeyx (Hermon) Dağı da daxil olmaqla, bəzi ərazilərdə İsrail, Suriya və ABŞ qüvvələrinin birgə mövcudluğu təmin ediləcək. Səudiyyə Ərəbistanının “Əl-Ərəbiyə” telekanalına danışan israilli bir rəsmi, bu yeni tənzimləmənin 1974-cü il atəşkəs razılaşmasına oxşar xarakter daşıdığını, lakin müəyyən kiçik dəyişikliklərlə fərqləndiyini bildirib.

Həmin səlahiyyətli şəxs əlavə edib ki, danışıqlar paketində Süveyda əyalətinə İsraildən humanitar yardım dəhlizi açılması məsələsi yer almayıb. O, qeyd edib ki, Amerika planına görə, humanitar yardım dəhlizi yalnız Dəməşq istiqamətindən təşkil ediləcək. İsrail tərəfi ABŞ və Suriyaya ölkə daxilindəki hər hansı ayrılıq çağırışlarını dəstəkləmədiyini bildirib. Suriya hökuməti isə amerikalılara Dürzilərə ziyan verməyəcəyinə və Süveyda vilayətinin zəruri ehtiyaclarını, iş yerlərini və əməkhaqlarını təmin edəcəyinə söz verib.

Razılaşmanın vacib elementlərindən biri sərhəddəki bütün prosesləri izləmək üçün üç tərəfli bir mexanizmin qurulmasıdır. İsrailli rəsmi təsdiqləyib ki, iki ölkə sərhədindəki bütün inkişafları müşahidə etmək məqsədi ilə ortaq bir Suriya-ABŞ-İsrail təhlükəsizlik komitəsinin yaradılması barədə anlaşma əldə olunub. Vaşinqton İsrailə, növbəti ilin əvvəlinə qədər Cənubi Suriya məsələsini həll etməyi və Dəməşqlə münasibətlərini qaydaya salmağı təklif edib.