İstanbulda Şiddətli Fırtına: 38 THY Reysi Ləğv Edildi

Güclü küləyin təsiri ilə İstanbulda hava şəraiti pisləşib. Bu səbəbdən Türk Hava Yolları (THY) İstanbul hava limanından olan 38 reysin ləğv edildiyini açıqlayıb. Ləğv olunan reyslərin 10-u daxili, 28-i isə beynəlxalq xətlərə aiddir.

Meteoroloji Xidmətindən verilən xəbərdarlıqlardan sonra şiddətli lodosun təsiri davam edir. Sabiha Gökçen hava limanında da uçuşların ləğvi ilə bağlı xəbərlər yayıldıqdan sonra THY də İstanbul hava limanından olan bəzi reysləri ləğv etmək qərarı verib.

THY-nin mətbuat katibi Yahya Üstün sosial mediada paylaşdığı açıqlamada bildirib ki, Meteoroloji Acil Durum Komitəsinin (MADKOM) qərarına əsasən, İstanbulda gözlənilən güclü fırtına səbəbindən hava limanının fəaliyyətində %10 məhdudiyyət tətbiq olunub və bu səbəbdən 23 noyabr tarixli reyslərdən 38-i ləğv edilib.

Meteoroloji üzrə Baş İdarə (MGM) Marmara bölgəsi üçün güclü külək və fırtına xəbərdarlığı verib. MGM-nin İstanbul Regional Proqnoz və Erkən Xəbərdarlıq Mərkəzinin açıqlamasına görə, axşam saatlarından etibarən Marmara bölgəsində qərb hissəsindən başlayaraq güclü külək və fırtına gözlənilir.

İstanbul Böyükşəhər Bələdiyyəsinin Acil Yardım Koordinasiya Mərkəzi (AKOM) də İstanbulda axşamdan etibarən fırtına, sabahdan isə yağışın gözlənildiyini bildirib və vətəndaşları ehtiyatlı olmağa çağırıb.