Katolik Kilsəsinin Rəhbəri Papa 14. Leo Türkiyədə - Uçuşu Flightradar24-də Rekord Qırdı

Katolik Kilsəsinin rəhbəri və Vatikan Dövlət Başçısı Papa 14. Leo ilk rəsmi xarici səfəri çərçivəsində Türkiyənin paytaxtı Ankaraya gəlib. Bu səfərə olan yüksək maraq dərhal özünü göstərdi: Roma-Ankara marşrutu ilə hərəkət edən təyyarə, real vaxt rejimində uçuşları izləmə xidməti olan "Flightradar24" sistemində ən çox təqib edilən uçuş olub. Bu fakt, dünya ictimaiyyətinin dini liderin səfərinə nə qədər diqqət yetirdiyini göstərir.

Papa 14. Leonu daşıyan təyyarə - "ITA Airways" şirkətinə aid, quyruq nömrəsi EI-INA olan "Airbus A320" modeli idi. O, yerli vaxtla səhər 07:58-də Romadan havaya qalxaraq, günorta 12:30-da Ankara Esenboğa Hava Limanına eniş edib. Papa 14. Leonun Türkiyə səfərində ilk dayanacağı Ankara şəhəri oldu. Paytaxtdakı sıx proqramı çərçivəsində Papa əvvəlcə Anıtkabiri ziyarət edəcək, daha sonra isə Prezident Rəcəb Tayyib Ərdoğanla görüş keçirməsi gözlənilir. O, həmçinin Diyanət İşləri İdarəsinin sədri Safi Arpaquşla da görüşlər aparacaq. Bütün bu görüşlərdən sonra dini lider axşam saatlarında İstanbula yola düşəcək.

Papa 14. Leonun noyabrın 28-i Cümə günü üçün nəzərdə tutulmuş proqramı isə İstanbul və Bursa şəhərlərini əhatə edir. İstanbulda o, ilk olaraq Harbiye rayonundakı Müqəddəs Ruh Katolik Kilsəsində (Saint Esprit Katolik Kilsəsi) yepiskoplar, keşişlər, diakonlar və digər ruhanilərlə görüşlər keçirəcək. Bu görüşdən dərhal sonra Papa Fransız Kasıbxanasına (Fransız Fakirhanesi) səfər etməyi planlaşdırır. Həmin günün sonunda dini lider Bursanın İznik rayonuna gedəcək və orada yerli dindarlar üçün bir ayinə rəhbərlik edəcək.