Livanın Druzi Lideri Vəlid Canbolatdan Süveydə Bəyanatı: Suriyanın Suverenliyi və Birliyi Qorunmalıdır

Livanın tanınmış druzi lideri və Tərəqqiçi Sosialist Partiyasının keçmiş sədri Vəlid Canbolat, Suriyanın cənubunda yerləşən Süveydə əyaləti ilə bağlı mühüm bəyanat verərək, bölgənin ölkənin ayrılmaz hissəsi olduğunu vurğulayıb. O, birinci dərəcəli məqsədin xarici müdaxilələrin qarşısını almaq və Suriyanın ərazi bütövlüyü, eləcə də suverenliyini qorumaq olduğunu bildirib. Canbolat Suriya “Əl-İxbariyyə” kanalına verdiyi müsahibədə deyib ki, Süveydədə baş verən hadisələrin araşdırılması, ədalətin bərqərar edilməsi və milli barışığın təmin edilməsi regiondakı böhranı bitirəcəkdir. Lider həmçinin Dəməşq hökumətinin milli dialoq və uzlaşma qapısını ciddi şəkildə açmağa çalışdığını qeyd edib.

Canbolat bütün tərəfləri Süveydədə baş verən son faciəvi hadisələrə görə Suriyanın və beynəlxalq təhqiqatların nəticələrini gözləmədən qərar verməməyə çağırıb. O, yaşananların "dərin yara" açdığını bildirərək, bu hadisələr zamanı İsrail bayraqlarının daşınmasını qətiyyətlə pisləyib. Druzi lideri əlavə edib ki, bu cür davranışlar Süveydə xalqının nə milli, nə də ərəb kimliyini əks etdirmir. Bundan başqa, o, bəzi dairələrin "Cəbəl əl-Ərəb" adını "Cəbəl Başan" kimi dəyişdirmək cəhdlərinin tarixi və milli kimliyi pozmaq məqsədi daşıyan qəsdli bir səy olduğunu söyləyib və bu cür təşəbbüslərin yolverilməz olduğunu vurğulayıb.

Livan-Suriya münasibətləri məsələsinə toxunan Canbolat, bu əlaqələrin iki müstəqil dövlət arasında təbii və sağlam bir əlaqə olmasının zəruriliyini dilə gətirib. O bildirib ki, münasibətlər qarşılıqlı suverenliyə hörmət əsasında, İsrailə qarşı təhlükəsizlik və iqtisadi əməkdaşlıq zəminində qurulmalıdır. Canbolat bəzi Livan siyasi qruplarının hələ də Bəşər Əsəd rejiminin durumunu qəbul etməkdə çətinlik çəkdiyini deyib, lakin iki ölkə arasında barışıq və əməkdaşlıq əsasında yeni bir səhifə açılmasının vacibliyini vurğulayıb. Lider həmçinin Dəməşq və Beyrut arasında təhlükəsizlik və məhkəmə sahələrində effektiv əməkdaşlığın təmin edilməsini, sərhəd nəzarətinin gücləndirilməsini və Livandakı suriyalı məhbuslar məsələsinin hər iki ölkənin suverenlik hüquqlarına hörmətlə həll edilməsini təklif edib.

Qeyd edək ki, Süveydədəki gərginlik iyulun 13-də Bədəvi ərəb qəbilələri ilə druzi silahlı qrupları arasında başlayan kiçik toqquşmalarla ortaya çıxıb. Bölgedəki Suriya təhlükəsizlik qüvvələri druzi qrupların hücumları nəticəsində ciddi itkilər verib. Toqquşmaların böyüməsindən sonra atəşkəs əldə edilsə də, bu razılaşma tezliklə pozulub və İsrail ordusu Suriya hökumət qüvvələrini hədəf alan hücumlar təşkil edib. İsrail Hərbi Hava Qüvvələri iyulun 16-da Suriya Prezident İqamətgahı, Baş Qərargah və Müdafiə Nazirliyini vurub. Gərginliyin azaldılması üçün sentyabrın 16-da Şamda Suriya, İordaniya xarici işlər nazirləri və ABŞ-ın xüsusi nümayəndəsinin iştirakı ilə görüş keçirilib. Bu görüşdə Süveydə hadisələri üçün ortaq yol xəritəsi razılaşdırılıb. Həmin yol xəritəsi zərərçəkənlərə təzminat ödənilməsini, kəndlərin bərpa edilməsini və köçkünlərin geri qayıtmasının asanlaşdırılmasını təmin edəcək addımları əhatə edir.