Məşhur İspaniya müğənnisi Encarnita Polonun qocalar evində şübhəli ölümü: Cinayət işi açıldı

“Paco, Paco, Paco” mahnısı ilə bütün dünyada tanınan İspaniya sənətçisi Encarnita Polo, qaldığı qocalar evində şübhəli şəkildə həyatını itirib. İlkin məlumatlar 86 yaşlı sənətçinin eyni müəssisədə yaşayan başqa bir şəxs tərəfindən hücuma məruz qaldığını göstərir. Bu dəhşətli hadisə İspaniyada böyük rezonansa səbəb olub. Sevilya doğumlu məşhur müğənni və aktrisa Encarnita Polo, paytaxt Madriddən təxminən iki saatlıq məsafədə yerləşən Ávila şəhərindəki qocalar evində vəfat edib.

Hadisə ilə əlaqədar İspaniya Milli Polisi genişmiqyaslı məhkəmə araşdırmasına start verib. İlkin araşdırmalar göstərir ki, Encarnita Polo həmin qocalar evində məskunlaşan, 80-dən yuxarı yaşda olan bir kişi tərəfindən boğularaq öldürülüb. Şübhəlinin əqli problemləri olduğu bildirilir; o, cinayətdən dərhal sonra psixiatriya xidmətinə yerləşdirilib. Bu faciə ölkə gündəmini zəbt edib və məşhur sənətçi Encarnita Polonun müəmmalı ölümü ilə bağlı suallar yaranıb.

Encarnita Polo 1939-cu ildə Sevilyada dünyaya gəlib. Atasının vəfatından sonra ailəsi ilə birlikdə Barselonaya köçüb və musiqi dünyasına ilk addımlarını burada atıb. Karyerasının əvvəlində o, ənənəvi Əndəlüs musiqisi ilə məşğul idi. Lakin 1960-cı illərin əvvəllərində fransız müğənni Şarl Aznavurun tövsiyəsi ilə pop musiqisinə keçid edib. 1963-cü ildə ilk valını buraxan sənətçi, qısa müddətdə geniş kütlə tərəfindən sevilib və musiqi səhnəsində özünəməxsus yer tutub.

1960-cı illərin ortalarında Polo tez-tez televiziya proqramlarına qonaq kimi dəvət olunurdu və bu, onun şöhrətini İspaniya hüdudlarından kənara çıxarıb. O, Portuqaliya, Fransa və İtaliyada böyük pərəstişkar kütləsi toplayıb. Sənətçinin beynəlxalq uğuru 1964-cü ildə İtaliyadakı musiqi festivalında birincilik mükafatı qazanması ilə daha da möhkəmlənib. Onun "Paco, Paco, Paco" kimi hitləri onu dünya miqyasında tanınan bir sima etmişdi.