Monteneqroda Türkiyə Vətəndaşlarına Hücum Planlaşdıran Şəxslər Saxlanıldı - Viza Rejimi Dayandırıldı

Monteneqro polisi ölkədə yaşayan Türkiyə vətəndaşlarına qarşı hücum hazırlığında şübhəli bilinən şəxslərin saxlanıldığını açıqlayıb. Paytaxt Podqoritsada türk vətəndaşlarına və onların sahib olduğu müəssisələrə qarşı bir neçə yanğın və təcavüz hadisəsi baş verdikdən sonra gərginlik yüksəlmişdi. Polis bu gün yaydığı bəyanatda hücum üçün hazırlanmış beysbol çubuqlarının ələ keçirildiyini bildirib. Saxlanılan şəxslərin dəqiq sayı ilə bağlı əlavə məlumat verilməsə də, onların şiddət aksiyaları planlaşdırmaqda şübhəli bilindikləri qeyd olunub.

Podqoritsa Polis İdarəsinin açıqlamasına görə, polis bu əməliyyatları əvvəlki gecə baş verən hadisədən sonra gücləndirilmiş fəaliyyətlər çərçivəsində həyata keçirib. Qeyd edək ki, Podqoritsada M.J. adlı yerli vətəndaşa biri Türkiyə, digəri isə Azərbaycan vətəndaşı olan iki əcnəbi tərəfindən hücum edilmişdi. Bu hadisədən sonra sahədəki təhlükəsizlik vəziyyəti diqqətlə izlənilib. Həmçinin, sosial mediada nifrət və zorakılıq çağırışları edən paylaşımlarla bağlı araşdırmalar aparılıb. Polis, Zabjelo məhəlləsində "Komanka" binasının yaxınlığında potensial hücumlar üçün saxlanılan çox sayda beysbol çubuğu tapıb və müsadirə edib.

Gərginliyin artmasına səbəb olan hadisələrdən biri də ötən şənbə axşamı Zabjelo məhəlləsində türk vətəndaşlarının da iştirak etdiyi və bir nəfərin bıçaqlandığı insident olub. Hadisədən sonra bölgədə türk vətəndaşları əleyhinə etirazlar və zorakılıqlar baş verib. Rəsmi bəyanatlarda və mediada hadisədə iştirak edənlərin birbaşa "Türkiyə vətəndaşları" kimi təqdim edilməsi, eləcə də bəzi radikal monteneqrolu siyasətçilərin sərt çıxışları vəziyyəti daha da gərginləşdirib. Nəticədə, ötən gecə Türkiyə vətəndaşlarına məxsus müəssisələrə qarşı yanğın törətmə əməlləri qeydə alınıb.

Baş verən bu təhlükəsizlik problemləri fonunda, Monteneqro hökuməti bu gün qərar qəbul edərək Türkiyə vətəndaşları üçün tətbiq edilən vizasız səyahət rejimini müvəqqəti olaraq dayandırıb. Polis qurumları vətəndaşlara hər cür zorakılıqdan uzaq durmağa çağırış edir və təhlükəsizliyi qorumaq üçün sahədə intensiv fəaliyyətlər həyata keçirəcəyini vurğulayıb. Qanunsuz və məsuliyyətsiz davranışlara yol verən hər kəsin, istisna olmadan, cəzalandırılacağı və qanun çərçivəsində məhkəməyə çıxarılacağı bildirilir. Bu addımlar ölkədəki ictimai asayişi bərpa etmək məqsədi daşıyır.