Nyu Yorkda Yerli Seçkilər: Əsas Namizədlər, Mövzular və Trampın Müdaxiləsi

Birləşmiş Ştatların ən böyük şəhəri olan Nyu Yorkda milyonlarla seçici yerli hakimiyyət orqanlarına səs vermək üçün seçki məntəqələrinə yollanıb. Bu seçkilər, Prezident Donald Trampın siyasi təsirinin ilk böyük sınağı kimi qəbul edilir. Səsvermə prosesinin Bakı vaxtı ilə səhər saat 05:00-da başa çatması gözlənilir. ABŞ-ın ən böyük şəhərini idarə etmək uğrunda üç namizəd mübarizə aparır: Demokrat Zohran Mamdani, Müstəqil Endryu Kuomo və Respublikaçı Kertis Sliva.

Sorğulara görə öndə gedən Zohran Mamdani, şəhərin ilk Müsəlman və Cənubi Asiyalı bələdiyyə başçısı olmaq iddiasındadır. Bu yerli yarış Trampın müdaxiləsi ilə milli səviyyəyə qədər genişləndi. Tramp, Mamdani əleyhinə çıxaraq, keçmiş siyasi rəqibi Endryu Kuomonu dəstəklədi. O, seçiciləri sol görüşlü Mamdani kimi namizədə səs verməməyə çağırdı. Tramp, Mamdani qələbə qazanarsa, Nyu Yorka “kommunist” adlandırdığı siyasətçinin idarə etdiyi halda "çox pul verməyin çətin olacağını" bildirdi. Bu maliyyə təhdidi qarşısında Mamdani başçıya qarşı çıxacağını açıqladı. Mamdani bir debatda, “Əgər Nyu Yorklularla bu cür davranmaq istəyirsə, əvvəlcə məni keçməlidir,” deyərək cavab verdi.

Nyu York əhalisi üçün seçkilər, həyatın hər sahəsində üzləşdikləri yaşayış böhranı və yüksək kirayə haqqı xərcləri ilə mübarizə aparmaq baxımından çox önəmlidir. Ucuz yaşayış mənzilləri təminatı üç namizədin də kampaniyasının əsas mövzusu idi. Bundan başqa, namizədlər arasında gedən müzakirələrdə ictimai nəqliyyatın ödənişsiz edilməsi, şəhərdə polis sayının artırılması, evsizlik probleminin həlli və əqli sağlamlığa dəstək kimi mühüm sosial məsələlər müzakirə edildi. Seçicilərin verəcəyi qərar bu sosial və iqtisadi çətinliklərin gələcək həll yollarını müəyyənləşdirəcək.

Birləşmiş Ştatlarda Nyu Yorkdan savayı, başqa bölgələrdə də seçkilər keçirilir. Virciniya və Nyu Cersidə seçicilər yeni qubernatorlarını seçmək üçün səs verirlər. Gelenəksəl olaraq Demokratların güclü mövqeyə sahib olduğu Nyu Cersidə aparılan sorğular namizədlər arasında sıx bir yarış olduğunu göstərir. Virciniya ştatı isə, seçkidən seçkiyə Demokratlar və Respublikaçılar arasında əldən-ələ keçən bir əyalətdir və buradakı nəticələr ölkənin ümumi siyasi gedişatını əks etdirəcək. Eyni zamanda Kaliforniyada seçicilər ABŞ Nümayəndələr Palatası rayon xəritələrinin yenidən çəkilib-çəkilməməsinə dair qərar verirlər. Mütəxəssislər bütün bu yarışların nəticələrinin 2026-cı il Konqres aralıq seçkiləri üçün ciddi göstərici ola biləcəyini düşünürlər.